Fo Da Hebrew Peopo 11

Hawai‘i Pidgin

Trus God

11 Now, wen we trus God, dat mean we stay shua bout da stuff we stay waiting fo. Wen we trus God, we know dat God goin do dat stuff bumbye, no matta we no see um right now. ² Da peopo from befo time, dey wen trus God no matta dey no see um, an dass why God wen say dey good peopo.

³ Wen us guys trus God, den we goin undastan dat God ony wen say da ting, an dass how he wen make da world, da sky, an everyting. He neva make wat we see from da odda tings we see.

Abel

⁴ Befo time, had one guy name Abel. He wen trus God, an dass how come his sacrifice was mo betta den da sacrifice his brudda Cain wen give God. Cuz Abel wen trus God, az why God wen tell dat Abel stay get um right wit God, an dat Abel, he wen give God good kine sacrifice. No matta Abel mahke, he still yet stay talking to us guys, cuz he wen trus God.

Enok

⁵ One nodda guy Enok, he wen trus God. Dass why God wen take him away, an he neva mahke. Cuz God wen take him away, nobody no can find him dat time. But befo God wen take him, God wen tell, “Enok, he one good guy. He do everyting I like him fo do.” ⁶ An you know, whoeva no trus God, dey no can make God stay good inside. Cuz whoeva like come tight wit God, dey gotta believe dat God stay. An if dey like know him fo real kine, dey gotta believe dat God goin make shua dey goin know him.

Noah

⁷ Noah, he wen trus God. Dass why God wen tell Noah, “Watch out! Bad kine stuff goin come, da kine stuff dat nobody eva see yet.” Noah wen get plenny respeck fo God, dass why he wen make one big boat fo take his ohana guys outa da big flood. He trus God, an dat wen show, dat da odda peopo inside da world do da bad kine stuff. But Noah, he wen get um right wit God, cuz he wen trus God.

Abraham

⁸ Abraham, he wen trus God. One time God wen tell him fo go one place dat goin come his land bumbye. So Abraham, he wen listen God, an he wen go, no matta he neva know wea da place stay. ⁹ He wen trus God, so he wen make house ova dea, cuz God wen make promise fo give him dat land bumbye. He not from dea. He ony wen live dea inside tents. His boy Isaac an his grankid Jacob, dey wen live same way too. Dass cuz God wen make da same promise to dem. ¹⁰ Abraham, he stay waiting fo live inside da big town dat get da solid kine foundations. Dass da big town dat God wen make plan fo, an build.

Sarah

¹¹ Sarah, Abrahamʼs wife, she wen trus God too. Dass how she wen get power fo start one ohana, no matta she no can come hapai, cuz she too old. God wen make promise to her dat she goin born one kid, an she wen trus God dat he everytime do wat he say. ¹² So den, dis one guy Abraham, he wen born kids no matta he litto mo mahke awready. An da kids come so plenny dat no can count um, jalike no can count da stars inside da sky o da sand on top da beach.

How Come Get Peopo Dat Trus God Plenny?

¹³ All dose peopo, dey wen trus God all da time till dey mahke. No matta dey neva get da stuff God wen promise, dey know dat dey goin get um bumbye. Dey stay good inside, jalike dey see um awready from one far place. An dose peopo tell dat dey not from dis world. Dey ony staying short time ova hea. ¹⁴ You know, whoeva talk lidat, dat kine peopo show dat dey really like get to da place dat goin stay dea own country fo real kine. ¹⁵ An if dose guys was tinking bout da country dey wen leave befo time, den dey had plenny chance fo go back dea. ¹⁶ But dey neva. Dey stay tinking plenny bout dat mo betta place inside da sky wea God stay. Cuz a dat, God, he no mo shame wen dey say, “He our God.” We know dat, cuz get one big town dat he wen make ready fo dem.

Abraham an Isaac

Abraham, he wen trus God dat time wen God wen check him out. So, he like give up his boy Isaac fo make him be da sacrifice. Befo time, God wen make promise to Abraham bout dat boy. God wen tell um befo time, “You goin get plenny ohana, an Isaac, he goin be da one dey goin come from.” Dass why Isaac was da ony boy dat Abraham wen call his boy fo real kine. An dass da one dat Abraham was making ready fo be da sacrifice. ¹⁹ Abraham wen figga dat God, he get da power fo make peopo come back alive from mahke. An dat time, wen happen jalike Isaac wen mahke, an den come back alive.

Isaac

²⁰ Isaac, he wen trus God da time he tell Jacob an Esau, “I like God do plenny good tings fo you Jacob, an I like God do plenny good tings fo you Esau.” Wen he say dat, he talking bout da tings dat goin happen bumbye.

Jacob

²¹ Jacob, he wen trus God. Dass why jus befo Jacob wen mahke, wen he bend ova his walking stick, he wen show love an respeck fo God. He wen tell his grankids, Josephʼs two boys, “I like God do plenny good tings fo you Efraim, an fo you Manasseh.”

Joseph

²² Joseph, he wen trus God. Dass why, jus befo he wen mahke, he wen tink plenny bout da time wen da Israel peopo goin go outa Egypt bumbye. An he wen tell da Israel peopo fo take his bones wit dem wen dey go.

Moses Mudda An Fadda Guys

²³ Moses mudda an fadda, dey wen trus God. Dass why, afta he wen born, dey wen hide him fo three months, cuz dey see dat he one spesho baby. Dey no scared da king, no matta he wen tell, “Gotta kill all da Hebrew boys!”

Moses

²⁴ Moses, he wen trus God. Dass why, wen he come big, he no let nobody make to him like he King Pharaohʼs daughtaʼs hanai boy no matta dass true. ²⁵ Moses wen figga, mo betta he stick wit Godʼs peopo, an suffa plenny wit dem, den he do da bad kine stuff dat feel good, but no last. ²⁶ He tinking mo betta come shame cuz he stay trus da Spesho Guy God Goin Send bumbye, den get all da rich kine stuffs dat get inside Egypt. Cuz he stay shua dat God goin pay him back good kine.

²⁷ Cuz Moses wen trus God, dass why he wen go outa Egypt. An wen he go, he no scared da king, no matta da king plenny huhu wit him. Moses wen hang in dea, cuz jalike he wen see God, dat nobody can see.

²⁸ An cuz Moses wen trus God, he wen do jalike God wen say, fo tell da peopo fo make da Passova sacrifice, an sprinkle da sheep blood all aroun dea doors. Den God no let da killa angel guy wipe out da numba one boy inside da houses dat get da blood on top da doors.

Da Israel Peopo

²⁹ Da Israel peopo, dey wen trus God. Dass why dey wen walk thru da middle a da Red Sea, cuz was jalike dry land dat time. But wen da Egypt guys wen try fo do da same ting, da water wen wipe um out.

Rahab

³⁰ Da peopo wen trus God, dass why dey wen make parade fo seven days outside da big wall dat go aroun Jericho town. An den da whole wall wen fall down.

³¹ An had Rahab, one wahine dat fool aroun fo money. She wen trus God, dass why she wen get aloha fo take in da Israel guys dat was spying, fo hide um. So, wen God wen wipe out da Jericho peopo dat neva like listen to him, he neva wipe her out.

Odda Peopo Wen Trus God An He Help Um

³² So, wat? I can talk plenny mo bout odda peopo? Yeah, can, but no mo time fo tell everyting bout da guys Gideon, Barak, Samson, Jeftah, David, Samuel, an da odda guys dat wen talk fo God befo time. ³³ All dem guys wen trus God. Dass how dey wen fight an win agains da odda kings an dea countries. Dey wen do wass right fo help da peopo. Dey wen get da stuff dat God wen promise dem. Dey wen fight an win agains lions. ³⁴ Dey wen make da big fire do notting to dem. Dey wen get away from da guys dat like kill um wit swords. Dey not strong, but dey wen come strong. Dey wen get plenny power fo fight da army guys from odda countries. Dey wen make whole armies run away. ³⁵ An had wahines too. Dea ohana guys wen mahke, an den wen come back alive, cuz dea wahines wen trus God. Cuz a dat, dey wen get um back.

Odda Peopo Wen Trus God An Still Yet Get Hard Time

But had odda guys dat wen trus God, an dey wen get all bus up real bad. Dey neva like sell out to da guys dat go agains dem jus so dey can get outa trouble. Cuz dey know dey goin get one mo betta life bumbye -- dey goin come back alive afta dey mahke. ³⁶ An had odda peopo too. Peopo wen laugh at um an whip um hard, an mo worse dey wen tie up odda guys wit chains an throw um inside da jail. ³⁷ Dey wen throw rocks fo kill um. Dey wen half half dea bodies wit da saw fo kill um. Dey wen kill um wit swords.

Dem guys gotta go live any kine place an dey ony get sheep skin o goat skin fo wear. Dey neva have notting. Peopo make any kine to dem, an give um plenny presha. ³⁸ Dey wen go all ova da boonies, on top da mountains, inside da caves an da big holes inside da groun. Eh! Dat kine peopo, dey too good fo dis world, you know!

³⁹ An all dose guys, God say dey good peopo, cuz dey wen trus him. Still yet, dey neva get da tings God wen promise um. ⁴⁰ Dass cuz God wen make plan fo do someting mo betta. So dem guys togedda wit us guys, goin get da ting God wen promise us, an come jalike we all suppose to.