Bible Book List

Fo Da Rome Peopo 4Hawai‘i Pidgin (HWP)


So den, Abraham, da ancesta guy dat us Jewish peopo all come from, wat we get fo say bout wat wen happen to him?

We can say dis: If Abraham wen get um right wit God cuz a da stuffs he wen do, den he can go talk big bout dat. But in front God he no can talk big notting.

Dis wat da Bible say:

“Abraham wen trus God,
    Dass why God wen say dat Abraham get um right wit him.”

Cuz wen get one guy dat work, his boss pay him fo dat. Da pay not one present -- dass wat da boss owe um. God da One dat get da right fo say dat whoeva trus him, dey da one dat get um right wit him, no matta dey neva care bout God befo time. No can work fo get um right wit God, ony gotta trus God, an den God goin say dat you stay right.

Same ting. David wen talk bout how peopo goin stay good inside wen God say dat dey get um right wit him, an dey neva work notting fo dat. He say:

“Da peopo dat wen broke Godʼs Rules,
    God wen let um go,
An wen hemo dea shame.
    Az why dey stay good inside!
Da peopo dat wen do da bad kine stuffs,
    God wen hemo dem from all da bad kine stuffs dey wen do.
Da guy can stay good inside
Wen da Boss no make one list
    A da bad kine stuff da guy wen do.”

You tink ony da Jewish guys dat get da cut skin mark, dey da ony ones can stay good inside lidat, an da odda guys, dey no can? You know, awready we wen tell dat Abraham wen trus God, an cuz a dat, God wen tell dat Abraham get um right wit him. 10 Kay den, wat time was, wen God wen say dat? Was wen Abraham get da cut skin mark, o befo wen he neva get da mark? Eh, he neva say dat afta he wen get um, but wen he neva have um yet.

11 Bumbye Abraham wen get da cut skin mark. Dat wen show proof dat he wen go trus God. Was befo Abraham get da mark dat God wen say Abraham get um right wit him. Dass how Abraham wen come jalike da fadda fo everybody dat trus God, an God wen say dey get um right wit him, no matta dey no mo da mark. 12 Same time Abraham stay jalike da fadda fo da Jewish guys dat get da mark too. But not jus cuz dey get da mark, but cuz dey stay trus Christ jalike Abraham wen trus um, befo he wen get da cut skin mark.

We Trus God, An We Get Wat He Promise

13 God wen promise Abraham an da peopo dat goin come from him afta, dat bumbye dey goin own da whole world. God wen say dat cuz Abraham wen trus God, an get um right wit him. But God neva say dat Abraham goin get um jus cuz he do wat da Rules say.

14 You know, da peopo dat ony like stick wit Godʼs Rules, if dey wen get wat God wen promise jus cuz a dat, den az no mean notting fo trus God, an poho da promise God wen make. 15 Weaevas get Godʼs Rules, goin get peopo who goin broke um, an God no goin take it. Weaeva Godʼs Rules no stay, no mo nobody goin broke um.

16 Dass why you betta trus him. God like do plenny good tings fo da peopo who trus him. Dass how we know dat Godʼs promise stay fo shua fo all us guys who come from Abraham. Not da peopo dat get Godʼs Rules ony, but da peopo dat same time trus God, jalike Abraham. cuz he jalike da fadda fo all us guys. 17 God wen say inside da Bible, “I wen make you da fadda fo plenny diffren kine peopos.” Fo shua God goin make dat promise solid, an God, he da One dat Abraham wen trus. God make da peopo come back alive afta dey mahke. He ony gotta say someting fo make someting dass fo real come from notting.

18 Abraham wen trus God an wen wait fo him, even wen he neva see notting coming from God. Dass how he wen come “da fadda fo plenny diffren kine peopos,” jalike da Bible wen say, “Goin get plenny peopo come from you.” 19 Abrahamʼs trus was strong fo God, no matta he figga, his body litto mo ready fo mahke, cuz he near hundred year old, an Sarah, she no can come hapai awready. 20 Abraham neva tink dat God no can do um, an den pau trus God. His trus fo God wen stay solid, cuz he know how awesome God stay. 21 Abraham wen know fo shua dat wateva God wen promise, he strong nuff fo give um. 22 So dass why God wen figga dat Abraham get um right wit him.

23 Wen da Bible say how God figga dat, he no say dat ony fo Abraham, 24 he say um fo us guys too. God goin figga we get um right wit him too, if we trus him. Cuz God da One dat wen make Jesus our Boss come back alive afta he wen mahke. 25 Jesus wen mahke cuz we neva make how we suppose to. An den, he wen come alive again fo make us guys get um right wit God.

Hawai‘i Pidgin (HWP)

Copyright © 2000 by Wycliffe Bible Translators International. All rights reserved


1 of 1

You'll get this book and many others when you join Bible Gateway Plus. Learn more

Viewing of
Cross references