Deuteronomio 28:2-14

Ang Biblia (1978)

² At ang lahat ng pagpapalang ito ay darating sa iyo at ^(A)aabot sa iyo, kung iyong didinggin ang tinig ng Panginoon mong Dios.

³ Magiging mapalad ka sa bayan, at magiging ^(B)mapalad ka sa parang.

⁴ Magiging mapalad ^(C)ang bunga ng iyong katawan, at ang bunga ng iyong lupa, at ang bunga ng iyong mga hayop, ang karagdagan sa iyong bakahan at ang mga anak ng iyong kawan.

⁵ Magiging mapalad ang iyong buslo at ang iyong palayok.

⁶ Magiging ^(D)mapalad ka sa iyong pagpasok, at magiging mapalad ka sa iyong paglabas.

^7 (E)Pasasaktan ng Panginoon sa harap mo ang iyong mga kaaway na nagbabangon laban sa iyo: sila'y lalabas laban sa iyo sa isang daan at tatakas sa harap mo sa pitong daan.

⁸ Igagawad sa iyo ng Panginoon ang kaniyang pagpapala sa iyong mga kamalig, at sa lahat ng pagpatungan mo ng iyong kamay at pagpapalain ka niya sa lupain na ibinibigay sa iyo ng Panginoon mong Dios.

^9 (F)Itatatag ka ng Panginoon na isang banal na bayan sa kaniya, gaya ng kaniyang isinumpa sa iyo; kung iyong gaganapin ang mga utos ng Panginoon mong Dios, at lalakad ka sa kaniyang mga daan.

¹⁰ At makikita ng lahat ng mga bayan sa lupa, na ikaw ay tinawag sa pamamagitan ^(G)ng pangalan ng Panginoon at sila'y ^(H)matatakot sa iyo.

¹¹ At ikaw ay pasasaganain ng Panginoon, sa ikabubuti mo, sa bunga ng iyong katawan, at sa bunga ng iyong mga hayop, at sa bunga ng iyong lupa, sa lupain na isinumpa ng Panginoon sa iyong mga magulang upang ibigay sa iyo.

^12 (I)Bubuksan ng Panginoon sa iyo ang kaniyang mabuting kayamanan, ang langit, upang ibigay ang ulan sa iyong lupain sa kapanahunan, at upang ^(J)pagpalain ang buong gawa ng iyong kamay; at ikaw ay magpapahiram sa maraming bansa, at ikaw ay hindi hihiram.

¹³ At gagawin ka ng Panginoon na ^(K)ulo at hindi buntot, at ikaw ay magiging sa ibabaw lamang, at hindi ka mapapasailalim; kung iyong didinggin ang mga utos ng Panginoon mong Dios, na aking iniuutos sa iyo sa araw na ito, na iyong sundin at gawin;

^14 (L)At huwag kang lilihis sa anoman sa mga salita na aking iniuutos sa inyo sa araw na ito, sa kanan o sa kaliwa, upang sumunod sa ibang mga dios na paglilingkuran sila.