2 Pedro 3

Ne Bibliaj Tik Nawat

3 Nuyejyektasujtatuk, ashan nimetzintitania ini ukse tajkwilul, wan tik yejemet nikishatia ne anmuyulu chipawak pal anwalisat ² wan ankielnamikit tay inatuyat ne taketzanimet ipal Teut wan tay tatuktij ne tajtzin wan tamakishtiani itech ne anmutijtitanijtuk. ³ Shikmatikan ini achtu: tik ne tijtipan tunal walasket ajkawetzkanimet ne muwikat ken yejemetsan kielewiat, ⁴ wan inasket: "Ken ijtuk iwan ne promesaj ka yawi walmuneshtia yajane? Ika ne tejteteku kuchket wan muchi naka kenha ken kwak pejki!" ⁵ Ika kinekit kielkawat ka ikman nemituya ne ilwikak, wan kiski ne tal ijtik at wan itech at, ika inak ne Teut kiane. ⁶ Inpanpa, ne taltikpak pal ikman puliwik ijtik weyat. ⁷ Wan ne ipalabraj ne Teut kiantuk ne ilwikak pal ashan, wan ne tal, wan tajpia iwan tit hasta se tunal kwak ne takamet te yejyek yawit muchiwat juzgar wan yawit puliwit.

⁸ Nuyejyektasujtatuk, semaya ini nikneki ma inte shikelkawakan: ka se tunal ipal ne Teut ken mil shiwit, wan mil shiwit ken sanse tunal. ⁹ Tutajwan inte ishtuna tajpia ne projpromesaj, ken inat ajaka, asunte yaja techchia senpa, ika inte kineki ma puliwi aka, yaja kineki ma welikan muyulpatat muchi.

¹⁰ Ne tunal ipal ne Tajtzin yawi witz ken se techtekini. Tik uni tunal ne ilwikak yawi panu iwan wey chachalaka, muchi tay ashan nemi yawi muchichinua wan musentalua, wan ne tal wan muchi tay muchijtuk ijtik yaja yawi muajsi.

¹¹ Kwak muchi uni musentalua, shikejketzakan ken muneki ma shimuchiwakan wan ma shimuwikakan yek, ¹² wan ma shikchiakan wan ma shiknelwikan ne tunal ipal ne Teut. Yaja yawi kichiwa ma tata wan ma musentalu ne ilwikak, wan ma muchichinu wan ma pati muchi tay ashan nemi. ¹³ Tikchiakan tel ne yankwik ilwikak wan ne yankwik tal kan muchantia tamelakchiwalis ken Yaja kichijki prometer.

¹⁴ Neka, yejyektasujtatuk, shikchiakan muchi ini; shimunelwikan, maka shimususulwikan, maka shikpiakan nian se anmupelech, ma Yaja metzinhajsi nejmachnemit. ¹⁵ Wan shikajsikan tamakishtilis ijtik ne iweytejchialis ne Tajtzin, ken techilwijtuk ne tuiknew tasujtatuk Pawlo ne tajkwiluj iwan ne tamatilis ne kikwij, ¹⁶ ken nusan yaja tanutza tik muchi ne tajtajkwilul wan tik yejemet ina ijkiuni, kan nemit sejse ujuij pal tikmatit, wan kimajmalinat sekit ne inte mumachtijtiwit wan te kimatit tay kinekit, ken nusan kichiwat iwan ne sejseuk tay muijkwilujtiwit, wan yajika yawit puliwit.

¹⁷ Yajika tel, yejyektasujtatuk, anmejemet ká kimatit ini achtu, shikishpelwikan pal te metzinwikat ijtik ne mushijshikulis ipal ne inte yejyek wan welit ankipuluat anmuvalor.

¹⁸ Shiweyakan tik tetasujtalis wan tik taishmatilis ipal ne tutajtzin wan tutamakishtiani Yeshu Mawaltijtuk, ne yawi tzitzinaka senpa, amen.