A A A A A
Bible Book List

2 Timoteo 4Ne Bibliaj Tik Nawat (NBTN)

Nimetznawatia tik itachialis ne Teut wan ne Mawaltijtuk Yeshu ne yawi kichiwa juzgar ne yujyultuk wan ne miktiwit, wan nimetznawatia ipanpa ne imuneshtilis wan ne itatekimakalis: shiknajnawati ne palabraj; shikchiwa tay muneki su ne horaj yek wan nusan su te. Shiteajwa wan shimutajtaweli iwan weytejchialis wan tamachtilis senpa, ika yawi ajsi ne horaj kwak te yawit kichiwiliat casoj ne yejyek tamachtilis; yawit kichiwat tay kinekit wan insel kintalisket tamachtianimet pal kikakit tay ne kinekit takakit; yawit kishkwepat intakakilis, pal kiane te takakit ne tejkia sute sema cuejcuentoj. Taja tel shinejmachnemi tik muchi; shikeku ne tay te yek; shikchiwa itekiw se tayeknawatiani wan ne itekitilis nusan shikchiwa yek.

Nuesyu yawia mushinia wan witzaya ne tunal pal niajkewi. Nitasuntuk ne yek tasumalis, niktamij ne nutekiw, nitajpishki ne tayulmatilis; ashan nechchia ne yawal ipal tamelakchiwalis ne yawi nechmaka ne Tajtzin, ne yek juez, tik uni tunal; tesu naja nusel, muchi ne kitasujtatiwit ne imuneshtilis.

Shimutatemuili pal tiajsi nutech talul, 10 ika Demas nechajkawtuk; sujsul kitasujta ne taltikpak pal ashan wan yajtuk tik Tesalonika, Kreskes tik Galatia, Titus tik Dalmatia. 11 Nuwan naka isel Lukas. Shikwi Marcus wan shikwika muwan, ika nechpalewia sujsul iwan ne tekitilis. 12 Niktitanijtuk Tukikos tik Epesos. 13 Ne nutaken ne nikajkaw tik Troyas ichan Karpos shalwika kwak tiwitz, wan ne ajamat, wan tay mas muneki, ne ajamatzitzin.

14 Aleksandro ne kashchiwani nechchiwilijtuk miak inteyek. Ma kitashtawi ne Teut ipanpa tay kichijtuk. 15 Taja nusan shikishpelwi, ika sujsul kinankilij ne tupajpalabraj.

16 Tik ne nuachtu juicioj, te aka ajsik nechpalewia, muchi nechnaktijket. Ma te mupua pal tashtawiat! 17 Ne Tajtzin nechpalewij wan kichijki ma nichikawaya pal kiane weli yekawi ne tanajnawatilis wan pal takakit muchi ne tejtechan. Wan nimumakishtij itech iten ne tekwani. 18 Ne Tajtzin yawi nechmakishtia itech muchi tay yawi muchiwa tay te yek, wan yawi nechtajpia ipal ne itatekimakalis tik ne ilwikak. Ma inakan ka wey senpa wan senpa, amen.

19 Shiktajpalu Prisca wan Aquila wan muchi ichan Onesiporos. 20 Erasto nakatuk tik Korinto. Nikajkaw Tropimos tik Miletos ika kukuya. 21 Shimutatemuili pal tiwitz kwak teuk ajsi ne shupan. Metztajpalua Ewbulos wan Pudes wan Linos wan Claudia wan muchi ne tukniwan. 22 Ma nemi ne Tajtzin iwan ne muijiu. Ma nemi ne teutasujtalis anmuwan.

Ne Bibliaj Tik Nawat (NBTN)

Ne Bibliaj Tik Nawat · © 2008, 2012 Jan Morrow

  Back

1 of 1

You'll get this book and many others when you join Bible Gateway Plus. Learn more

Viewing of
Cross references
Footnotes