A A A A A
Bible Book List

2 TESALONICENSES 3Mam de Todos Santos Chuchumatán (MVJ)

Chi naˈna Dios kiˈja, tz̈i Pablo

Yaltzen jaˈlewe, key ocslal, tuˈn tpon baj kyola, cxeˈl kcubsaˈna kwitza cyey tuˈn cynaˈna Dios kiˈja, tuˈntzen kcamana tuˈn tabij tpocbal Kaaw cyuˈn nim xjal, bix tuˈn tnimj cyuˈn xjal, tisen e baj tej tpon tpocbalxin cyxola. Jax chi naˈna Dios kiˈja tuˈn kcleta tuj cykˈab kej xjal yaaˈn baˈn. At xjal kaˈ, cuma yaaˈn cykilca xjal at cyocslabl tiˈ Cristo.

Yaltzen te Kaaw, cbinel tuˈnxin jma tkbaxin tuˈn tbint tuˈnxin, bix ctzaal tkˈoˈnxin cyipemala tuˈn miˈn cub cyiˈja tuˈn taaw il. Bix n‑oc ke kcˈuˈja tiˈjxin tuˈn ttzaj tonenxin cyiˈja tuˈn tbint cyuˈna jma txiˈ kkbaˈna cyey, yaaˈn nuk jaˈlewe, juˈx cyuj kˈij chi ul. Bix tzajxit tkˈoˈn Kaaw tuˈn toc takˈ Dios cyey bix tuˈn tten cypasensyey tisen te Cristo.

Il tiˈj tuˈn kakˈanan

Jaˈlewe, key ocslal, tuˈnj kipemala kˈoˈn keya tuˈn Kaaw Jesucristo, cxeˈl kkbaˈna cyey tuˈn tel cypaˈn cyiiba cyiˈj kej ocslal cycyˈi tuˈn t‑xiˈ cykˈon cyiib tiˈ akˈuntl bix cycyˈi tuˈn t‑xiˈ cyiiˈn cychunkˈlal tisen e xiˈ kxnakˈtzaˈna cye. Baˈn cyuˈna tuˈn cyxiˈ lpey tiˈj jyecˈbil e cyaj kkˈoˈna, cuma yaaˈn cyˈaj koˈya tej ktena cyxola. Min e waaˈn koˈya ka min e chjet kuˈna. Akˈanan koˈya te kˈij bix te koniyan bix nim e sict koˈya tuˈn kitzˈja, tuˈn miˈn cub kkˈoˈna jun iketz cyibaja. Amale atet koclena tuˈn kwaaˈna cyiˈja, pero akˈanan koˈya tuˈn tcnet kwaya, tuˈntzen t‑xiˈ kkˈoˈna jun yecˈbil cyey ti tten tuˈn miˈn chi tena cyˈaj. 10 Bix yaaˈn nuk jlu, sino tuyax e xiˈ kxnakˈtzaˈna cyey, ka at jun xjal tcyˈi tzˈakˈanan, jax miˈn waaˈn. 11 Nchin tzˈiˈbena juˈwa cuma ma kbiˈya at juun cyxola min nxiˈ cyiiˈn cychunkˈlal tuj tumel. Min chi akˈananxin, sino nuk n‑ex cykˈij ttziiˈ cyja xjal. 12 Tuˈnj yol kˈoˈn keya tuˈn Kaaw Jesucristo, cxeˈl kkbaˈna cyej xjal cyˈaj lu tuˈn miˈn nuk tzˈex cykˈij, sino tuˈn cyakˈananxin, bix tuˈn cywaaˈnxin cyexxin cywaxin. 13 Perotzen cyey, key ocslal, miˈn cyaj cykˈoˈna tuˈn cybinchantiya jbaˈn.

14 Katzen at jun ocslal tcyˈi tzˈoc tbiˈn ja yol tiˈj akˈuntl nxiˈ ktzˈiˈbena tuj ja kuˈja lu, cykbanxa cye ocslal, bix miˈn chi waaˈna tuyaxin, tuˈntzen tnaˈntexin tchˈixewxin. 15 Pero miˈn tzˈoc cykˈoˈna tisen jun aj kˈojxin cyiˈja. Nuk oˈcx tuˈn t‑xiˈ cykˈoˈna xnakˈtzbil texin tisen jun ocslalxin.

Jun kˈolbebl tuˈn Pablo te mancˈbil yol

16 Nuk ja Kaaw kˈolte kmojbabl kiib. Tzajxit tkˈoˈnxin tuˈn cytena tuj ttz̈yal jaca kˈij. Tenxit‑xin cyuyey cykilcakey.

17 Inayena, Pablo, ncub ntzˈiˈbena ja mancˈbil yol tzalu, tisenx nbint wuˈna tuj cykilca wuˈja, tuˈn tel cyniˈya tiˈj yaaˈn juntl nxiˈ tzˈibente ja uˈj lu, sino inayenxa. 18 Tenxit t‑xtalbil Kaaw Jesucristo cyuyey cykilcakey.

Oˈcx nyolja.

  Back

1 of 1

You'll get this book and many others when you join Bible Gateway Plus. Learn more

Viewing of
Cross references
Footnotes