A A A A A
Bible Book List

2 TESALONICENSES 1Mam de Todos Santos Chuchumatán (MVJ)

Tcab uˈj e xiˈ ttzˈiˈben Pablo cye ocslal tuj tnom Tesalónica

Jun kˈolbebl tuˈn apóstol Pablo

Inayena, Pablo, tuyax Silvano bix Timoteo, nxiˈ ntzˈiˈbena ja uˈj lu te cyey ocslal tuj tnom te Tesalónica, key t‑xjal Kman Dios bix t‑xjal Kaaw Jesucristo. Tzajxit cykˈoˈnxin xtalbil cyey bix tuˈn cytena tuj ttz̈yal.

Oj tul meltzˈaj Cristo cwel cycastiwa aj il tuˈn Dios

Key ocslal, il tiˈj bix tumel tuˈn t‑xiˈ kkˈoˈna chjonte te Dios jaca kˈij cyiˈja, cuma tz̈ˈiyne tz̈ˈiy cyocslabla tiˈ Cristo tuyax tkˈakˈbil tcˈuˈj teeyle juun cyxola. Ejooˈya tzalu nim nko tzalaja cyiˈja tuˈn cyocslabla tiˈ Cristo bix tuˈnj tkˈakˈbil cycˈuˈja, bix nxiˈ kkbaˈna cye t‑xjal Dios at cypasensyey bix min cyaj cykˈoˈna cyocslabla, amale niyˈxet qˈuixcˈaj bix pena cyuˈna nuk tuˈn cyocslabla.

Pjeltzen t‑xkeˈlen Dios te cykilca xjal tuj tumel, bix tzinen taˈ cxeˈl tkbaˈnxin baˈn tuˈn cyocxa tuj tcawbilxin, cuma niyˈx qˈuixcˈaj cyuˈna nuk tuˈn tlaj tcawbilxin. Cuma tuj tumel cˈoquel tcyeˈyenxin cykil xjal, juˈ tzunj ctzaal tkˈoˈnxin cycastiwa kej xjal nchi yajlan cyiˈja. Bix te cyey bix te keya nko yajlaj, ctzaal tkˈoˈnxin coˈpbil oj ttzaj tsmaˈnxin Kaaw Jesucristo tuj cyaˈj cyuyax t‑ángel tuya nimxsen cyipemal. Tzulxin tuj tken kˈakˈ tuˈn t‑xiˈ tkˈoˈnxin cycastiwa kej xjal cycyˈi Dios bix el cyxooˈn jcolbil e takˈ Kaaw Jesucristo. Cycastiwatzen ctzaal tkˈoˈnxin, jaj tuˈn tel tpaˈnxin ejeeˈ tiˈjxin te junx maj. Chi elel kˈiˈn twitzxin, bix mlay chi ten jaaˈ nkoptzˈaj jjawnex tipemalxin. 10 Nuk ckˈojel cycastiwa oj tulxin tuˈn tjaw nimsaˈnxin cyuˈn t‑xjalxin bix tuˈn cyjaw kleeˈ cykilca ocslal tiˈjxin. Bix cyuyaxa chi kˈola nimbil texin tuj tzunj kˈij, cuma ocslankey tej kkˈumena tyol Dios cyxola.

11 Tuˈntzen tbint tuˈn tnimsaj tbi Kaaw cyuˈna, jaca kˈij nko naˈna Kman Dios cyiˈja. Nko naˈna Dios tuˈn cyoca jun wik t‑xjal Dios tuˈn ttzalajxin tiˈj, bix tuˈn toc cyipena tiˈj tuˈn tbint jbaˈn cyuˈna, bix tuˈn tonenxin cyiˈja tuya tipemalxin tuˈn ttzket cyocslabla. 12 Nko naˈna Dios cyiˈja tuˈntzen tjaw nimset tbi Kaaw Jesucristo, bix tuˈn cyela baˈn tuj twitzxin. Tuˈnj t‑xtalbil Kdios bix tuˈn Kaaw Jesús, cjawel nimsaˈn cybiy tuj tzunj kˈij tzul.

  Back

1 of 1

You'll get this book and many others when you join Bible Gateway Plus. Learn more

Viewing of
Cross references
Footnotes