1 Tesalonika 5

Ne Bibliaj Tik Nawat

Te aka kimati keman yawi witz ne Tajtzin

5 Ipanpa keman yawi witz yajuni, nukniwan, te muneki nitajkwilua anmupal, ² ika anmejemetsan kimatit ka ne tunal ipal ne Tajtzin witz kenha ken se techtekini ne tayua. ³ Keman tamit inat "muchi tinejmachnemit wan tinemit yek", wan te kichiat tatka, nemanhachin yawi wilewi muchi, yawi ken ne wey takukulis ipal se yawi puni, wan te yawit chuluat.

⁴ Anmejemet, nukniwan, te ankunyuanemit pal ma metzinhitzki ne tunal ken se techtekini, ⁵ ika muchi anmejemet ipal ne tawil. Tejemet te tiipal tayua nian ipal takumi. ⁶ Yajika tel, ma te tikuchikan ken ne sekit, sute tinakakan tikishpelwiat wan ma te titawanakan, ⁷ ika ne kuchit, kuchit ka tayua, wan ne mutawantiat, mutawantiat ka tayua. ⁸ Tejemet ká tiipal tunal, ma te titawanakan, tiktalikan tik tuelpan tayulmatilis wan tetasujtalis, wan timutzuntzakwakan iwan tejchialis ka tiawit timumakishtiat, ⁹ ika ne Teut te techtemakatuk iwan ikwalan sute pal tikpiat tamakishtilis ipanpa ne tutajtzin Yeshu Mawaltijtuk, ¹⁰ ká mikik ka tumaku, pal su tikishpelwiat wan nusan su tikuchit, senpa tiawit tiyujyultuk iwan. ¹¹ Yajika, shimutajtawelikan ne se ipal ne seuk, wan ne se ma kiketza ne seuk, ijkiunisan ken ankichiwat.

Shimuwikakan ken muneki

¹² Timetzintajtanit, nukniwan, ma shikishmatikan ne tekitit ijtik anmejemet, wan ne metzintekimakat ipal ne Tajtzin, wan ne metzinnawatiat, ¹³ wan ma shikintasujtakan sujsul ipanpa ne intekiw.

Shinejmachnemikan ijtik anmejemet.

¹⁴ Timetzintajtanit, nukniwan, ma shikinnawatikan ne te tetakamatit; ma shiktasujtakan ne tamatit chiupi; shiktajpiakan ne te welit tatka; wan ma wey anmuyulu iwan muchi.

¹⁵ Shitachiakan ma te kichiwa aka se tay teyek ipatka se tay teyek, mas yek shumet senpa iipan ne yek anmutzalan, wan kenhaya iwan muchi.

¹⁶ Sejsenpa shipajpakikan.

¹⁷ Maka keman shimuketzakan teutajtanit.

¹⁸ Tik muchi shitamakakan padiush: ika yaja tay kineki ne Teut itech ne Mawaltijtuk Yeshu ma shikchiwakan.

¹⁹ Ne Ijiutzin maka shumet shiksewikan.

²⁰ Ne teujteutaketzalis, maka shinakan ka te tatka ipatiw.

²¹ Shikwikan muchi; ne tay yek, shikanakan; ²² muchi tay muita ka teyek, wejka!

Tami

²³ Ma metzinteuchiwa ne Teut ipal nejmachnemilis yajasan tik muchi, wan ma te kipia tatka tay teyek muchi anmuijiu wan anmuyulu wan anmuweyka, pal kwak yawi witz ne tutajtzin Yeshu Mawaltijtuk. ²⁴ Yek ne metzinnutza, asu yaja nusan kichiwas.

²⁵ Nukniwan, shiktajtanikan ne Teut nusan tupanpa. ²⁶ Shiktennamikikan muchi ne tukniwan ken Cristianojmet. ²⁷ Nimetzintajtani tik itukay ne Tajtzin ma takakikan ini tajkwilul muchi ne tukniwan. ²⁸ Ma nemi ne teutasujtalis ipal tutajtzin Yeshu anmuwan.