1 Korinto 3

Ne Bibliaj Tik Nawat

3 Nukniwan, naja te niwelituya nimetzinnutza ken sejse kipiat iijiu sute ken sejse ipal innakayu, ken sujsulin ipal ne Mawaltijtuk; ² nimetzinchichik, te nimetzintakwaltij ika te anwelituyat, wan teuk anwelit ashan, ³ ika anmejemet sejse ipal anmunakayu kenhayuk. Ika kan nemi anmutzalan kwalan wan musumalis, muita ka anmejemet sejse ipal anmunakayu wan anmuwikat ken takamet, ⁴ ika kwak ne se ina: "Naja niipal Pawlo", wan ne seuk: "Naja niipal Apolos", kineki ina ka antakamet.

⁵ Ká tel Apolos? Ká Pawlo? Titekitinimet. Tupanpa tayulmatket, sejse ken ne Tajtzin kimakatuk. ⁶ Naja nitatukak, Apolos atek. Ká ne tiskalij, yaja ne Teut. ⁷ Yajika, te tatka nian ne ká tatuka nian ne ká ateki, sute ne tiskalia: ne Teut. ⁸ Ne tatuka wan ne ateki sesan. Yawit kikwit sejse ipatiw ipatka ne itekiw sejse, ⁹ ika tiisejsentekitini Teut. Imil Teut, ihaciendaj Teut anmejemet.

¹⁰ Iwan ne tay ne Teut nechtakulijtuk, ken se wey kalketzani niktukak se tetzilnaj. Seuk kiketza ne kal. Ma kita sejse ken kalketza. ¹¹ Te aka weli kituka ukse tetzilnaj, sema ne mutukak. Yaja Yeshu Mawaltijtuk. ¹² Su aka kiketza ijpak ne tetzilnaj iwan teukwit, tumin, kujkusti, kwawit, sakat o ijikshi tatuk, ¹³ ne itekiw sejse yawi muita ika ne tunal yawi kineshtia: yawi muneshtia tik tit, wan tit yawi kiejekua pal muita ken ne itekiw sejse. ¹⁴ Su naka ne itekiw se, ne kalketzani yawi kikwi ipatiw. ¹⁵ Su tata ne itekiw se, ne kalketzani yawi kipulua. Yaja yawi mumakishtia sema ijkiuni, iwan tit.

¹⁶ Te ankimatit ka anmejemet iteupantzin Teut wan ne Teut muchantia ijtik anmejemet? ¹⁷ Su aka kishpulua ne iteupantzin ne Teut, ne Teut kishpulus yajane, ika uni tay ipal ne Teut uni teupantzin, wan anmejemet ne.

¹⁸ Ma te aka mushijshikua: su se anmejemet muita ka kimati wey tik ini taltikpak, ma muchiwa tzuntet pal mukwepa se ká kimati, ¹⁹ ika ne tamatilis ipal ini taltikpak, ipal ne Teut yaja chachalakalis. Ika muijkwilujtuk:

²⁰ Wan ukseujti:

²¹ Yajika, ma te aka muweymati ipanpa takamet. Ika muchi anmupal, ²² su Pawlo, su Apolos, su Kepas, su taltikpak, su nemilis, su mikilis, su ne ashkan, su ne musta, muchi anmupal. ²³ Anmejemet ipal ne Mawaltijtuk. Ne Mawaltijtuk ipal Teut.