Bible Book List

1 Timoty 4 Hawai‘i Pidgin (HWP)

Get Peopo Dat Bulai Wen Dey Teach

Godʼs Spirit say strait out dat bumbye befo da world pau some peopo no goin trus any mo da tings we trus. Dey goin stick wit odda spirits dat bulai, an trus da stuff da bad kine spirits teach. Dey say one ting an do da odda, an dey bulai. Dea heart no tell um dey wen do wrong, an dey no feel sorry notting wen dey do bad kine stuff. Da bulaia guys tell peopo dey no can marry, an no can eat dis kine food o dat kine food. But eh, you know, God wen make all kine food, so dat us guys dat trus him an know wass true, we can eat um an tank him fo da food. Everyting God wen make stay good. An we not suppose to no like take um, but we suppose to take um an tank God fo um. Da food stay spesho fo God, cuz God wen say dat, an cuz we tank him fo um.

Da Good Guy Dat Work Fo Jesus Christ

Try help da bruddas an sistas rememba dis tings. Den you goin be one good worka guy fo Jesus Christ. Wat God say goin help you trus him an know da good kine teaching. An you stay stick wit um. Dass jalike food dat help you come strong. Stay away from da lolo kine stories an da kine stories dat no mo respeck notting fo God. Mo betta, do da kine tings God like everytime. Wen one guy work out fo make his body come strong, dass good fo some tings. But gotta do da tings dat God like. Dass good fo everyting, fo da life ova hea inside dis world, an fo da real kine life we goin get bumbye. Wat I say stay true. You can take um all an trus um. 10 Us guys go fo broke an work real hard fo make all dis tings happen. Cuz we trus da God dat stay alive. He can take everybody outa da bad kine stuff dey doing, an dass wat he do fo da peopo dat trus him.

11 Eh Timoty! Go teach all dis stuff, an tell da peopo fo do um. 12 No let nobody give you attitude jus cuz you mo young den dem, but make good fo da peopo dat trus God fo show dem how fo ack -- how you talk, how you live, how you get love an aloha fo da peopo, how you trus God, an how clean yoa heart stay. 13 Till I come ova dea, stick wit reading da Bible to Godʼs peopo, tell da peopo Godʼs good kine words, an teach um. 14 No foget fo use da power God wen give you, dat time da older leadas in da church wen tell wat God like do wit you, an put dea hands on top you fo show you one leada too. 15 Try do all dose tings everytime ova an ova. Give um all you get, so dat everybody goin see how you do um mo betta. 16 Watch out how you ack an make shua you stay teaching right. Stick wit um, cuz if you do dat, you goin help take yoaself an da peopo dat stay hear you outa da bad kine stuff.

Hawai‘i Pidgin (HWP)

Copyright © 2000 by Wycliffe Bible Translators International. All rights reserved


1 of 1

You'll get this book and many others when you join Bible Gateway Plus. Learn more

Viewing of
Cross references