1 Timotaeaus 4  Reimer 2001

4 Nu sajcht dee Jeist enn kloare Wead daut enne latste Tiede woare eenje fonn dee Woarheit auf-faule, en woare Oobacht jaewe opp fefearesche Jeista, en Lea fonn beese Jeista;

² Mana dee em heichle Laeajes raede; daen aea Jewesse febrennt es soo aus met en heetet Iesa.

³ See febeede daut Mensche sikj befriehe sele, en febeede daut to aete waut Gott jeschaufe haft, daut dee, dee Gloowe ha, en folle Erkjantnes ha, met Dank aete kjenne.

⁴ Dan aul Gott siene Kjreatuare sent Goot, en nusscht bruckt auntsied jesat woare wan daut met Dank aunjenome woat;

⁵ dan daut es jeheilicht derch Gott sien Wuat en Jebaed.

⁶ Wan du dee Breeda dit faeastalst, woascht du en gooda Deena senne, en woascht jenoat woare derch dee Wead fom Gloowe, en dee goode Unjarecht dee du nojefoljcht hasst.

⁷ Hool die wajch fonn dee gottloose en oole Fruehes Foble, eew die enn daut waut jetlich es.

⁸ Dan kjarpaliche Eewunk haft mau weinich Nutse; oba Gottseelichkjeit haft Nutse fa aules, en haft Fespraeakunk fa dit Laewe, uk daut waut noch kjemt.

⁹ Dit es en woaret Wuat, en es Weat auntonaeme.

¹⁰ Dan doafaea oabeid wie, en straewe, dan wie ha onnse Hopninj opp daem laewendje Gott jesat, dee aulamaun Heilaunt es, besondasch fa daen dee jleewe.

¹¹ Doo dit befaele en leare.

¹² Lot kjeena diene Jugend fe-achte, oba sie en Faeabilt fa aul daen dee jleewe, en diene Raed, enn dien Waundel, enne Leew, em Gloowe, en enn Reinheit.

¹³ Hool aun dee Schreft to laese, en to femone, en to unjarechte bott ekj kom.

¹⁴ Sie nich Nachlaesich met dee Gow, dee die jejaeft wort met profitseihe aus dee Elteste aeare Henj opp die laede.

¹⁵ Eew die sorjfeltich doaenn, en laew doabenne, soo daut dien Jewaus doabenne fonn aule Mensche to seene es.

¹⁶ Sorj fa die selfst, uk fa diene Lea, bliew doabie; dan wan du daut deist, woascht du die selfst rade, uk daen dee die heare.