A A A A A
Bible Book List

1 Pedro 3Ne Bibliaj Tik Nawat (NBTN)

Ijkiasan ne siwatket: shimutalikan itankupa ne anmushujshulejyu, pal kiane asu sejse yejemet inte kiyulmatit ne palabraj, ne inmuwikalis ne siwatket yawi weli kinpalewia, melka te ankinhilwiat tatka, kwak kipachiwiat ken anmuwikat iwan tetakamatilis chipawak. Pal anmuekchiwat, inte muneki ma shiktajkwiltikan anmutzunkal, ma shimuyawalukan iwan teukwit wan ma shimutakentikan pal anmuitat gajgalantzin; mas yek yajane tay ichtaka ijtik anmuyulu, se muijiu yulyamanik, ipal nejmachnemilis, ne inte wilewi, uni kipia wey ipatiw tik itachialis ne Teut, ika ijkiuni muekchiwat ikman ne yejyek siwat ne kichiat Teut wan kitakamatit inshujshulejyu, ken Sara kitakamatki ne Abraham wan kinutzki "tajtzin". Anmejemet ikukunew, ankichiwat tay yek wan te anmajmawit ipanpa tatka tay tamutia.

Ne takamet kenhaya: shisennemikan wan shikmatikan ka ne siwat weli chiupi. Shimuwikakan yek iwan, ika ne anmuumeshtin yawit yujyultuk ipanpa teutetasujtalis, pal te mutzakwat ne anmutajtajtanilis.

Pal tami, shikpiakan muchi sanse taelewilis, shimuchiwakan tasenhekuanimet, shikintasujtakan anmukniwan, shiyujyulyamanik, shimuwikakan yek iwan muchi; maka shiktashtawikan teyek iwan teyek nian shiktejtenewakan ne metzintejtenewa, mas yek shikteuchiwakan, ika yaja taika metzinnutzket, pal ankipiat se bendicion. 10 Ika:

    "Ká ne kineki kitasujta nemilis

    wan kineki kita yejyek tunal

    ma inte taketza ken inte yek

    wan ma inte tashijshikua inenepil;

11     ma kiajkawa wejka tay teyek

    wan ma kichiwa ne yek;

    ma kishtemu nejmachnemilis

    wan ma nejnemi ka ipan"

12 ika

    "ne Tajtzin kinhita ne yejyek

    wan kinkaki mutajtaweliat;

    inte nemi inwan ne kichiwat tay teyek."

13 Wan ká yawi metzintateyekchiwilia asu senpa ankitemuat ne tay yek? 14 Wan asu nusan antaekuat ika ankichijtiwit tay yek, suertej! Maka shimajmawikan inpanpa, maka shikakasiwikan. 15 Shinakan ijtik anmuyulu ka wey ne Tajtzin Mawaltijtuk, wan shimuekchiwakan pal annankiliat senpa kwak metzintajtaniliat ipanpa ne anmutejchialis. 16 Shinankilikan iwan yulyamanikayu, nejnejmach, wan shikpiakan se yek tasenmatilis, pal kiane, kwak metzintejtenewat, ma ishpinawakan ne metzinhijilwiat ipanpa anmumuwikalis yek itech ne Mawaltijtuk, 17 ika mas yek ma shikchiwakan tay yek, su ne itaelewilis ne Teut kineki, que su ankichiwat tay teyek.

18 Ika nusan ne Mawaltijtuk seujti taekuj ipanpa ne tajtateyekchijtuk,

ne yek ka inmaku ne te yejyek,

pal metzinwika itech ne Teut,

wan melka mumiktijtuk anmuweyka

muyulkweptuk anmuijiu.

19 Wan yajika nusan yajki kinnajnawatia ne nawalmet tzajtzaktuk, 20 ne niakeman te tetakamattiwit, kwak ne Teut tejchia katka iwan weytejchialis tik ne tujtunal ipal Noa kwak muajshitij se takukal kan chiupi mumakishtijket itech ne at, semaya chikwey almaj. 21 Wan ashan ne at metzinmakishtia, ini ne teulyujmakalis, tesu ika kishtia ne puknaj sute yaja kineki ina ne yek tasenmatilis iwan Teut ika Yeshu Mawaltijtuk muyulkwepki, 22 wan yajki ka ilwikak, wan nemi ka imayekkan ne Teut, wan tanawatianimet wan tatuktianimet wan ne welit sujsul wey kitakamatit.

Ne Bibliaj Tik Nawat (NBTN)

Ne Bibliaj Tik Nawat · © 2008, 2012 Jan Morrow

  Back

1 of 1

You'll get this book and many others when you join Bible Gateway Plus. Learn more

Viewing of
Cross references
Footnotes