A A A A A
Bible Book List

1 Korinto 7Ne Bibliaj Tik Nawat (NBTN)

Tay inak ipanpa ne munamiktiat

Ipanpa tay ne annechilwijket: yek nemi ma se takat te kitali ne imey ijpak isiwaw. Semaya ipanpa ne tatzinhejenchiwalis, sejse takat ma kipia isiwaw wan sejse siwat ma kipia ishulejyu. Ne takat ma kikwepili ne isiwaw tay ne kiwikilia, wan ne siwat kenhaya iwan ne ishulejyu. Ne siwat te tatuktia ijpak ne iweyka, tatuktia ne takat; wan kenhaya, ne takat te tatuktia ijpak ne iweyka sute ne siwat. Maka shimuilwikan te, wan su ankichiwat, semaya su ne ujume kinekit ijkiuni ijtik se tiempoj ma shimusewikan ipal teutajtanilis, wan shipewakan senpa pal te ankiejekuat ne Tenewani ipanpa ne anmutaelewilis. Ini tay nina se tay weli muchiwa, te se tay nemi tuktijtuk. Melka niknekiskia su muchi kenhat ken naja, sejse kipia tay kimakatuk ne Teut, ne se ijkiuni, ne seuk ijkiuni.

Nikilwia ne te munamiktijtiwit wan ne tea kipiat inshulejyu ika mikik ka yek nemi su nakat ijkiuni; melka uni, su te kipiat intajpal pal inat te, ma munamiktikan, ika mas yek ma munamiktikan que su tatat.

10 Ini tay nikinhilwia ne munamiktijtiwit; tesu naja nitatuktia sute ne Tajtzin: ma te kiajkawa se siwat ishulejyu, 11 wan su kiajkawa ma naka kiane, ma te munamikti, wan su te, ma mukwepa itech ishulejyu; wan se takat ma te kiajkawa isiwaw.

12 Ne sejseuk nikinnutza naja, tesu ne Tajtzin: su se tuiknew kipia se isiwaw te tayulmati wan su ne siwat kita yek ma naka iwan, ma te kiajkawa, 13 wan su se siwat kipia se ishulejyu te tayulmati wan yajini kineki naka iwan, ma te kiajkawa ne ishulejyu. 14 Ika muteuchijtuk ne ishulejyu ne te tayulmati ipanpa ne siwat, wan muteuchijtuk ne isiwaw ne te tayulmati ipanpa ne takat ká tuiknew. Su tesu kiane, ne anmupilawan muchiwaskiat sujsusul; ashkan yejemet yejyek. 15 Su ne te tayulmati metzinhajkawa, ma yawi. Su ijkiuni, te muilpijtuk ne takat o ne siwat ká tuiknew; ne Teut metzinnutztuk ma shinejmachnemikan. 16 Ika tay tikmati, siwat, su tiaw tikpalewia ne mushulejyu, wan tay tikmati, takat, su tiaw tikpalewia ne musiwaw?

17 Mas yek, sejse ken kimajmakak ne Tajtzin, sejse ken kinutztuk ne Teut, ijkiuni ma nejnemi. Tik muchi ne sejsennemit nitatuktia kiane. 18 Nemituya yawaltektuk se kwak munutzki? Ma te muajkewa. Kipiatuya itzuntepul? Ma te muyawalteki. 19 Ne tayawaltekilis te tatka wan ne tzuntepul te tatka: semaya ma mupachiwia tay tatuktijtuk Teut. 20 Ma naka sejse ken nemituya kwak munutzki. 21 Munutzki kwak tekitini? Tesu panu tatka yajika! Melka uni, su tiweli timumakishtia, shikchiwa. 22 Ika ne tekitini ká munutztuk itech ne Tajtzin, yaja makishtijtuk ipal ne Tajtzin. Wan kenhaya, ne munutztuk ne te nemi itan aka, yaja itekitini ne Mawaltijtuk. 23 Metzinkujtiwit ipatka se anmupatiw; maka shimuchiwakan itekitini takamet. 24 Ken nemituya sejse kwak munutzki, nukniwan, ijkiuni ma naka ipal Teut.

25 Ipanpa ne teuk munamiktijtiwit, te nikpia tatuktilis ipal ne Tajtzin. Melka uni, nikpia se pal nimetzinhilwia, ken ne Tajtzin nechpalewijtuk nitaketza iwan tayulmatilis. 26 Nina tel ka uni yek ipal tay muneki ashan; nina ka yek ma naka se ijkiuni. 27 Su tikpia se musiwaw, maka shimutatemuili timusutuma. Su timusutuntuk itech siwat, maka shiktejtemu siwat. 28 Melka timunamiktia, te tikchijki tay teyek, wan su munamiktia se siwapil, te kichijki tay teyek. Ne kichiwat kiane, yawi kinpitzinia tik inweyka; naja nimetzinpalewia pal tesu.

29 Ini tay nina, nukniwan: ne tunal te nemi wejka. Tik ne tay naka, ká ne kipiat insiwawan, ma muchiwakan ken su te kipiaskiat, 30 wan ká ne chukat ken su te chukaskiat, wan ká ne pajpakit ken su te pajpakiskiat, wan ká ne takuat ken su te kipiaskiat tatka, 31 wan ká ne kikwit tay ipal ne taltikpak, ken su te, ika panu nemi muchi tay kipia ini taltikpak.

32 Nikneki ma te nemi tatka tay ne metzinkakasua. Ne ká te munamiktijtuk yulkakasiwi ipanpa ne Tajtzin, wan ken weli kipaktia ne Tajtzin. 33 Ne ká munamiktijtuk yulkakasiwi ipanpa ne taltikpak, ken weli kipaktia ne isiwaw. 34 Wan ne siwat ne te munamiktijtuk nusan nemi yulkakasujtuk, wan yulkakasiwi ne siwapil, ipanpa tay ipal ne Tajtzin wan muchi ipal Teut iwan ne iweyka wan ne iijiu. Ne siwat munamiktijtuk yulkakasiwi ipanpa ne taltikpak, ken weli kipaktia ne ishulejyu. 35 Nina ini pal yaja yek anmupal, tesu pal nimetzinhilpia sute pal ma yaja melawak wan pal welit tekitit ipal ne Tajtzin wan ma te shikpiakan tatka taika yujyulmakaskiat.

36 Su aka ina ka te nemi yek ken muwika iwan ne siwapil, su yajini sea uksituk wan nemi pal muchiwa ijkiuni, ma kichiwa ken kielewia: tesu tateyekchiwa; ma munamiktikan. 37 Ká ne inatuk tik iyulu wan kimati yek, tesu ika muneki sute weli kituktia ne itaelewilis wan kitztuk yek tik iyulu ma naka ijkiuni wan ma te munamikti, yek kichiwas. 38 Kiane, ká ne kinamiktia ne isiwapil, yek kichiwa, wan ká ne te kinamiktia, mas yek kichiwas.

39 Se siwat muilpijtuk muchi ne tujtunal ne yultuk ne ishulejyu. Su miki ne ishulejyu yaja weli munamiktia iwan ká kineki, semaya tik ne Tajtzin. 40 Naja nina ka mas yek su ijkiuni naka. Nina ka naja nusan nikpia iijiu ne Teut.

Ne Bibliaj Tik Nawat (NBTN)

Ne Bibliaj Tik Nawat · © 2008, 2012 Jan Morrow

  Back

1 of 1

You'll get this book and many others when you join Bible Gateway Plus. Learn more

Viewing of
Cross references
Footnotes