A A A A A
Bible Book List

1 Korinto 5Ne Bibliaj Tik Nawat (NBTN)

Shikishtikan tatenpan ne kichiwat tay teyek

Nujme mukaki ka tatzinhejenchiwat anmutzalan, wan ka tatzinhejenchiwat ken nian ijtik ne tejtechan muchiwa, hasta se kipia ne isiwaw ne iteku, wan anmejemet muishpitztiwit! Taika te anmutechtiat mas yek pal muishtia tik anmutajku ká ne kichijtuk ijkiuni? 3-5 Naja ká te ninemi né tik nuweyka, melka ninemi tik nuijiu, ninatuka ken su ninemiskia ma shimusentepewakan tik itukay ne tutajtzin Yeshu anmejemet, wan iwan ne nuijiu, pal antemakat ne ká ijkiuni kichijtuk iwan ne Tenewani ma wilewi ne iweyka, pal kiane ma mumakishti ne iijiu yajane tik ne tunal ipal ne Tajtzin.

Te yek ne anmumuweymatilis. Anka te ankimatit ka se chiupi shukutishti kichiwa ka kukukisa muchi ne chipusti ipal ne tishti? Shikijkwanikan ne palantuk shukutishti pal anmuchiwat se yankwik chipusti ken te ankipiat shukutishti. Ne tupaskwaj, ne Mawaltijtuk, nusan mumiktij. Yajika, tikchiwakan ne ilwit, te iwan shukutishti pal ikman nian iwan shukutishti ipal tay palantuk wan te yek, sute iwan ne tamal te kipia shukutishti, ne tamal ipal yulchipakayu wan tejkia.

Nimetzinhilwij tik nuamaw ma te shisennemikan iwan tatzinhejenchiwanimet. 10 Te niknekituya nina iwan ne tatzinhejenchiwanimet ipal ini taltikpak, nian iwan ne kielewiat tay tepal wan taitzkiat, nian iwan ne kitennamikit teutzitzinmet; su ijkiuni, munekiskia ma shikisakan ijtik ini taltikpak! 11 Ashan nimetzinhilwia ma te shisennemikan iwan ne se ká munutza tuiknew su yaja tatzinhejenchiwani o kielewia tay tepal o kitennamiki teutzitzinmet o teijilwiani o tawanani o se taitzkia: iwan se ijkiuni, nian shisentakwakan. 12 Ika tay nikneki iwan ne nemit tatenpan pal nina su yejemet yejyek o te? Shinakan su yejyek ne nemit kalijtik. 13 Ne Teut yawi ina su yejyek ne tatenpan nemit. Shikishtikan ijtik anmejemet ne ká teyek.

Ne Bibliaj Tik Nawat (NBTN)

Ne Bibliaj Tik Nawat · © 2008, 2012 Jan Morrow

  Back

1 of 1

You'll get this book and many others when you join Bible Gateway Plus. Learn more

Viewing of
Cross references
Footnotes