A A A A A
Bible Book List

1 Korinto 15Ne Bibliaj Tik Nawat (NBTN)

Sejseuk

15 Nukniwan, shikmatikan ne yeknawatilis ne nimetzinnawatij wan ankikwijket wan iwan annakat; itech anmumakishtiat su antajpiat, wan su te ankiyulmattiwit pal te tatka. Nimetzinmakak, ne achtu, tay ne naja nusan nikwijtuk: ka ne Mawaltijtuk mikik ipanpa tay tikchijtiwit teyek, ken mujkwiluj, wan ka mutalpachuj wan ka muketzki kwak panutiwit yey tunal, ken mujkwiluj, wan ka kiski iishpan Kepas, neman ne majtakti-ume, tipan iishpan mas que makwil tzunti tukniwan seujti, wan miak pal yejemet nemit kenhayuk, melka ankakeski miktiwit; tipan kiski iishpan Yakob, neman muchi ne tijtitanijtuk; ne tipan pal muchi, ken se nestuk kwak te nemituya pal nesi, nuishpan nusan, ika naja ne mas chikitik ipal ne tijtitanijtuk; te nitatka pal nimunutza titanijtuk ika niktalultij ne sennemit ipal ne Teut. 10 Ipanpa teutasujtalis nimuchijtuk ká naja, wan ne Teut nechtasujtak tesu pal te tatka nupatiw, ka nitekittuk mas que muchi - tesu naja sute ne itetasujtalis ne Teut nuwan. 11 Yajika, naja wan yejemet kenha titanajnawatijket wan kenha antayulmatket.

12 Asu munajnawatia ka ne Mawaltijtuk muketztuk kwak miktuya, ken inat ankakeski anmutzalan ka te aka muyulkwepa kwak miktuk? 13 Su te aka muyulkwepa kwak miktuk, ne Mawaltijtuk nusan te muyulkwepki. 14 Su ne Mawaltijtuk te muyulkwepki, kiane tel te tatka ipatiw ne tutanajnawatilis wan nusan te tatka ipatiw ne anmutayulmatilis! 15 Kineki ina ka nusan tinatiwit tay te tejkia ipanpa ne Teut, ika tinatiwit ka ne Teut kiketzki ne Mawaltijtuk wan te kiketzki su kiane ka te aka muyulkwepa kwak miktuk, 16 ika su te aka muyulkwepa, ne Mawaltijtuk nusan te. 17 Wan su te muyulkweptuk ne Mawaltijtuk, ne tay ankiyulmatit te tatka wan annakat iwan muchi tay antateyekchijtiwit. 18 Yajika, ne miktiwit itan ne Mawaltijtuk nusan pulijtiwit. 19 Su semaya tik ini nemilis titejchiat ipanpa ne Mawaltijtuk, tejemet titamakat mas lastimaj que muchi ne takamet!

20 Ashan muyulkweptuk ne Mawaltijtuk kwak miktuya, ken ne achtu ipal ne mijmiktuk, 21 ika ken nemi mikilis ipanpa se takat, nusan ipanpa se takat nemi muyulkwepalis, 22 ika kenha ken muchi yawit mikit ipanpa ne Adam, kiane nusan ipanpa ne Mawaltijtuk muchi yawit muyulkwepat. 23 Sejse kwak muneki: achtu ne Mawaltijtuk, tipan muchi ká ipal ne Mawaltijtuk kwak yaja ajsi witz; 24 neman ne tamilis, kwak yawi temaka ne tatekimakalis iwan ne Teut wan teteku, kwak puliwisket muchi ne tatuktianimet wan muchi ká tatekimakat wan welit wey, 25 ika yaja nemi pal tatekimaka hasta kintalia muchi ne kinekit kijtakuat itan ne ijikshi. 26 Ne tipan ipal yejemet ká puliwi, ne mikilis, 27 ika kitalij muchi itan ne ijikshi. Kwak ina ka muchi mutalijtuk itan itatuktilis, mumati ka kineki ina muchi asunte yajuni ká kitalij muchi itan itatuktilis. 28 Kwak tami kitalia muchi itan itatuktilis, kwakuni ne ipiltzin nusan yawi mutalia itan itatuktilis ne kitalia muchi itan itatuktilis, pal kiane ne Teut muchiwa muchi ijtik muchi.

29 Su te, tay kichiwat ne mumakat ulyuj inpanpa ne miktiwit, su ne miktiwit te keman muyulkwepat? Taika muulyujmakat inpanpa tel, 30 wan taika tisajsaytit senpa wan senpa? 31 Nimiki mujmusta! Uni tejkia ken ne anmumuweymatilis, nukniwan, ne nikpia tik ne Mawaltijtuk Yeshu, anmutajtzin! 32 Su nitekwanisunki ken se takat tik Epesos, ken nechpalewia su te muyulkwepat ne miktiwit? Su ijkiuni, titakwakan wan tiatikan, ka musta tiawit timikit! 33 Maka shimushijshikukan: tukujkunpawan teyek kishpuluat ne yejyek costumbrej. 34 Shimuchiwakan ken muneki wan maka shikchiwakan tay teyek. Ankakeski te kishmatit Teut; nina pal anhishpinawat!

35 Yawi ina ajaka: "Ken yawit muyulkwepat ne mijmiktuk? Kwak witz, ken iweyka?" 36 Mele! Ne tay tiktuka te yawi mulini su te miki, 37 wan ne tay tiktuka, tesu tiktuka ne iweyka tay yawi kipia sute se iish petznaj, tinakan tawial o tay tikneki. 38 Ne Teut kimaka iweyka ken kineki, wan kimaka sejse iish ne iweyka ken ipal. 39 Te muchi kipia kenha inakayu: ne inakayu takamet se wan ne inakayu takwalmet seuk, ne inakayu tujtutut se wan ne inakayu mijmichin seuk. 40 Nusan kipiat iweyka ne nemit ka ilwikak wan ne nemit pak ne tal: ne itawilyu tay ipal ne ilwikak se, wan ne itawilyu tay ipal ne tal seuk: 41 ne itawilyu ne tunal se, ne itawilyu ne metzti se, wan ne itawilyu ne sitalmet se; itawilyu se sital te kenha ken itawilyu ukse sital.

42 Nusan ijkiuni kwak ne miktiwit muyulkwepat. Mutuka pal wilewi, muyulkwepa pal te keman wilewi. 43 Kwak mutuka, se tay te yek; kwak muyulketza, tzitzinaka. Kwak mutuka, kukuya; kwak muyulkwepa, kipia itajpal. 44 Ne tay mutuka, se iweyka sema kipia itunal; ne tay muyulkwepa, se iweyka kipia iijiu. Su nemi se iweyka kipia itunal, nusan nemi se iweyka kipia iijiu. 45 Hasta muijkwilujtuk ijkiuni: Adam, ne achtu takat, muchijki se almaj yultuk; ne tipan Adam se iijiu tayulkwiltia. 46 Tesu achtu ne kipia iijiu sute ne kipia ialmaj; tipan ne kipia iijiu. 47 Ne achtu takat kiski tik tal, ipal tewti; ne ukse takat kiski ka ilwikak. 48 Ken nemi ne tay ipal tewti, nusan ijkiuni ne tay ipal tewti, wan ken nemi ne tay ipal ilwikak, nusan ijkiuni ne tay ipal ilwikak; 49 wan ijkiunisan ken tikwikatiwit ne itachialis ne tewti, nusan tiawit tikwikat ne itachialis tay ipal ne ilwikak.

50 Ini nina, nukniwan: ka se ipal nakat wan esti te yawi weli kipia ne itatekimakalis ne Teut, nian se yawi puliwi yawi kipia ne tay te keman wilewi. 51 Nimetzinhilwia ini tay ichtaka: melka muchi tejemet te tiawit timikit, muchi tiawit timupatat 52 mas talul que ne tuish weli tachia, kwak mukaki ne tipan trompetaj: yawi tzalani ne trompetaj wan ne mijmiktuk muyulkwepasket wan tea keman puliwisket, wan tejemet timupatasket, 53 ika ini tay puliwi nemi pal mutakentia tik ne tay te yawi puliwi, wan ne tay weli miki tik ne tay te keman miki.

54 Kwak ini tay puliwi yawi mutakentia tik ne tay te yawi puliwi wan ne tay weli miki yawi mutakentia tik ne tay te miki, kwakuni yawi muchiwa tay nemi ijkwilujtuk:

    "Tamik ne mikilis, mutuluj tik victoriaj!"

55 Mikilis, kan nemi ne muvictoriaj? Mikilis, kan nemi ne mutzupinka? 56 Ne itzupinka ne mikilis ne tateyekchijtuk. Ne itajpal ne tateyekchijtuk ne tajtuli. 57 Tikilwikan panpadiush ne Teut ne techmaka ne victoriaj itech ne Tutajtzin Yeshu Mawaltijtuk.

58 Yajika nukniwan yektasujtatuk, shinakakan chijchikawtuk, ma te metzinhijkwani tatka, shikchiwakan wey itekitilis ne Tajtzin senpa, wan shikmatikan ka ne anmutekiw kipia ipatiw ipal ne Tajtzin.

Ne Bibliaj Tik Nawat (NBTN)

Ne Bibliaj Tik Nawat · © 2008, 2012 Jan Morrow

  Back

1 of 1

You'll get this book and many others when you join Bible Gateway Plus. Learn more

Viewing of
Cross references
Footnotes