A A A A A
Bible Book List

1 CORINTIOS 16Mam de Todos Santos Chuchumatán (MVJ)

Jun cotz cye ocslal mebe

16  Cxeˈltzen ntzakˈbeˈna cyey tiˈj cykanbila tiˈ pwak nbaj cychmoˈna cyxol ejeeˈy ocslal tuj Corinto tuˈn t‑xiˈ cysmaˈna cye mebe ocslal tuj Jerusalén. Tisenj e xiˈ nkbaˈna cye ocslal tuj tnom te Galacia, juˈx cxeˈl nkbaˈna cyey. Oj cychmeta jaca tneel kˈij te smant, jaca juun cyey qˈuelel cyiiˈna chˈin tiˈj pwak ma cycamey tuj smant, tuˈn tcub cykˈoˈna te ofrenda. Ka nim chˈin ma cycamey, jaxle baˈn tuˈn nim chˈin cwel cykˈoˈna, bix ka yaaˈn nim ma cycamey, jax yaaˈn nim chˈin cy‑ofrendey. Juˈtzen cychmetel cy‑ofrendey nim. Ka nchi ayona ojxe npona cyxola tuˈntzen tcub cykˈoˈna cy‑ofrendey nuk te jun kˈij, yaaˈnxix nim pwak cychmetel. Oj npon cyxola, bix cyjoya cab xinak baˈnxix tuˈn t‑xiˈ cyiiˈn jcy‑ofrendey maa tuj Jerusalén. Bix cxeˈl nkˈoˈna cyuˈj tzin cykbaˈn alcyekexin bix ti cysanlalxin, tuˈntzen mintiiˈ chi oc iyˈkˈanxin tuj be tiˈ pwak. Bix ka at amleˈn wiˈja, chin xeˈl tzuna cyuyaxin.

Tej tcub tbisen Pablo tiˈj tuˈn t‑xiˈ tuj tnom Corinto

Ojtzen nxiˈy cyuyey, chin iˈyel tzuna tuj Macedonia te cyeyˈlcye ke ocslal jatzewe. Bix yajtltzen chin pomela cyuyey. Kape chin cyjela cyxola nim kˈij. Kape enterax jbalel chin temela. Bix yajtltzen chin cyonena tzuna tuˈn ttzyet nbeˈya, laˈ alcye be cxeˈl wiiˈna. Ka ma takˈ Dios, waja chin tena cyxola nim tyem. Yaaˈn nuk chin xeˈl aalxe te cab kˈij. Pero te jaˈlewe chin cyjela tzalu tuj tnom te Efeso hasta ojxe tbaj jninkˈij Pentecostés, cuma tzalu ma tzaj tkˈoˈn Dios weya tuˈn nkˈumena tyol Dios nim, bix at nim xjal n‑oc ebinte, amale atet nim xjal nkˈojlec wiˈja.

10 Pero cpomel nej Timoteo nwitza cyuyey. Jakˈa nakˈanan tuj taakˈen Kaaw tisen inayena. Pero attzen chˈin ttz̈i. Juˈ tzunj, oj tponkˈa cyxola, ccyiikˈel chˈin kˈey tuj tumel, tuˈntzen tel ttz̈i tiˈjkˈa. 11 Miˈn tzˈel cyiiqˈuen chˈina, sino bix chi onen chˈina tiˈjkˈa, tuˈntzen tul meltzˈajkˈa wiˈja tuj ttz̈yal. Cnyoˈkˈa tzalu tuyax cabtl ocslal hasta ojxe tul meltzˈajkˈa.

12 Yaltzen te Apolos, nim ma chin cubsan nwitza te tuˈn t‑xiˈ tjunen tiib cyuyaj xjal tuˈn tpon cyiiˈn ja uˈj lu cyey, pero tcyˈixin t‑xiˈxin jaˈlewe. Pero kape ponxin mas yaj oj ttzaj amleˈn tiˈjxin.

Jun kˈolbebl tuˈn Pablo cye ocslal tuj tnom Corinto

13 Mancˈbiltzen, key hermano, tuˈn tbaj twiˈ nyola cyuyey, cxeˈl nkbaˈna cyey tuˈn cyitzˈlente cyiiba, bix tuˈn chi weˈbilxixa tuj kocslabl tiˈ Cristo, bix miˈn chi cub yutˈpaja tuˈn ttz̈i, sino cyiw chi oqueley, bix tuˈn toc cyipey, 14 bix cykilca ti pjel cybinchama, tuyaxix tkˈakˈbil cycˈuˈja.

15 Wajtzen tuˈn tel cyniˈya tiˈ Estéfanas bix tiˈ ke te tja. Cytzkiˈntl tzuna tuj enterax txˈotxˈ te Acaya, Estéfanas cyuya ke te tja ejeeˈtzen tneel ocslalja, bix nim o chi akˈanan tuˈn cyajben cye niyˈtl ocslal. 16 Juˈ tzunj nchin cubsana nwitza cyey tuˈn cyxiˈ lpey tiˈ tnaablxin, bix tuˈn t‑xiˈ cyiiˈna tisen kej xjal nchi onen cyiˈ cabtl xjal tisenxsen jaxin.

17 Yal te weya, junxe chˈin njunala tzalu, cuma min‑al key wuyena. Pero nchin tzalaja o chi ulj oxe xjal te cytanema wuyena tzalu, jatzen Estéfanas tuya Fortunato bix tuya Acaico. 18 Ejeeˈ tzunxin o tzaj nimsante ncˈuˈja, bix oj cypon meltzˈaj cyxola, juˈx cxeˈl cynimsaˈn cycˈuˈja. Juˈ tzunj cˈoquel cybiˈna bix cyocslay cyyol.

19 Yaltzen ke ocslal cye ke tja Dios tzalu tuj txˈotxˈ te Asia, nxiˈ cykˈoˈn jun kˈolbebl te cyey jatzewe. Bix kej ocslal nchi chmet tuj culto tuj cyja Aquila bix Priscila nxiˈ cykˈoˈn tuya cykil cycˈuˈj jun kˈolbebl te cyey. 20 Bix nxiˈ cykˈoˈn jun kˈolbebl te cyey cykil ocslal tzalu tuj tnom te Efeso. Bix juˈx cyey, cykˈolbem cyiiba tuya nim tkˈakˈbil cycˈuˈja. 21 Jax juˈx inayena, Pablo, nxiˈ nkˈoˈna jun kˈolbebl te cyey, pero yaaˈn jun ntzˈiˈbila ncub tzˈiˈbente nkˈolbebla, sino inayena.

22 Ka at jun xjal mintiiˈ chˈin tkˈakˈbil tcˈuˈj tiˈ Kaaw, sbuˈnxittzen taˈ.

Tzulxit Kaaw Jesús.

23 Cyiikˈaxita t‑xtalbil Kaaw Jesús. 24 Te cykilca tzunkey n‑oc ke cycˈuˈja tiˈ Cristo Jesús, nxiˈ nsmaˈna wanema cyibaja.

Oˈcx nyolja.

  Back

1 of 1

You'll get this book and many others when you join Bible Gateway Plus. Learn more

Viewing of
Cross references
Footnotes