A A A A A
Bible Book List

1 CORINTIOS 14Mam de Todos Santos Chuchumatán (MVJ)

Tej tyole Pablo tiˈj oj nyole jun ocslal tuj jun wikxitl yol

14  Juˈ tzunj, key hermano, cˈoquel cykˈoˈna tilel tuˈn at tkˈakˈbil cycˈuˈja cyxola. Pero jax juˈx baˈn tuˈn tbint cyuˈna tuˈn Espíritu Santo jun cyaakˈena tuj taakˈen Dios. Bix tibaj cykilca, cyjyonxa tuˈn t‑xiˈ cykˈumena tyol Dios. Ojtzen tyolen jun ocslal tuj jun wikxitl yol min‑al n‑el tniyˈ tiˈj, nuk oˈcx nyolen te Dios, yaaˈn cyuya xjal. Amale nyolet tuˈn tipemal Espíritu Santo, min‑al qˈuelel cyniyˈ tiˈj tyolxin, cuma yaaˈn telniyˈ. Pero oj t‑xiˈ tkˈumen jun ocslal tyol Dios tuˈn tipemal Espíritu Santo, qˈueleltzen tniyˈ cabtl ocslal tiˈj, bix cbinel tuˈn tuˈntzen cytz̈ˈiy ocslal tuj tyol Dios, bix tuˈn cyxiˈ onet tuj cyocslabl tiˈ Dios, bix tuˈn n‑oc nimset cycˈuˈj. Jun ocslal nyolen tuj jun wikxitl yol min‑al n‑el tniyˈ tiˈj, nuk te te najbeˈna. Pero jun ocslal nkˈumen tyol Dios, tetzen cykilca ocslal najbeˈna.

Katzen cyaja cykilca key chi cyyolela tuj jun wikxitl yol min‑al n‑el tniyˈ tiˈj, baˈn. Pero jawe waj mas ka cykilcakey nchi kˈumena tyol Dios. Ja tej tkbaj tyol Dios mas il tiˈj twitzj yol minteyˈ telniyˈ. Pero katzen at jun te txˈolbalte ti elpenina jun wikxitl yol min‑al n‑el tniyˈ tiˈj, baˈntzen, cuma cˈajbeltzen cye ocslal tuˈn cytz̈ˈiy tuj tyol Dios. Ka oj npona cyxola bix chin yolela tuj jun wikxitl yol min‑al n‑el tniyˈ tiˈj, ¿ti cˈajbele nyola cyey? ¡Mintiiˈ! Pero ka ma txiˈ nkˈumena cyey alcye o tkba Dios weya, bix alcye n‑el nniˈya tiˈj tyol Dios, bix ka tzinen n‑oc wuˈna alcye toc tuˈn tyol Dios, bix ka nxiˈ nkbaˈna cyey alcye o nxnakˈtzaya tuj tyol Dios, cˈajbeltzen nyola cyey.

Cxeˈl nkˈoˈna juntl tumel cyey. Kej nchi oc kˈonte jun quitar bix ka jun xux, ka min bint chinbelte cyuˈn, nuk nlililin. Mintiiˈ tumel ti toc tuˈn. Ja tej ka ttxolante chinbelte, attzen tumel ti toc tuˈn. Juˈxsen oj cyxiˈ soldado tuj kˈoj. Jxjal cxeˈl kˈonte tumel cye soldado tuya trompeta laˈ alcye otk tkba cycawel, ka min s‑oc tkˈoˈn tuj tzinen, mlay tzˈel cyniyˈ soldado tiˈj ti cbinel cyuˈn. Juˈx oj nchi yolena. Ka min chi yolena tuj tzinen, ¿ti tten tuˈn tel cyniyˈ xjal tiˈj? Nuk tuj cykˈiˈk nchi yolena.

10 Cxeˈl nkˈumena juntl tumel. At nim wik yol twitz txˈotxˈ, bix tecˈalex juun tuya tyol bix n‑el tniyˈ tiˈj. 11 Pero ka at jun xjal ma tzaj yolen wiˈja bix min tzˈel nniˈya tiˈj tyol, te nakch xjal kena te texin, bix te nakch xjalxin te weya. 12 Juˈ tzunj ka cyaja chi akˈanana tuˈn Espíritu Santo, il tiˈj cyaja cyipemala tuˈn cyonena cyiˈj ocslal tuˈn tel cyniyˈ tiˈj.

13 Juˈ tzunj, key hermano, katzen at jun ocslal nyolen tuj jun wikxitl yol min‑al n‑el tniyˈ tiˈj, e t‑xiˈ tkanen te Dios tuˈntzen jax qˈuelel tniyˈ tiˈj titzen tyola, tuˈntzen t‑xiˈ ttxˈolbaˈn tyol cye cabtl. 14 Oj knaˈn Dios tuj jun wikxitl yol min‑al n‑el tniyˈ tiˈj, ja te kanem nyolen te Dios, yaaˈn knaabl. Juˈ tzunj min tzˈel kniyˈ tiˈj titzen tkbaˈn kanem. 15 Key hermano, ¿alcye baˈn tuˈn tbint? Baˈn tuˈn knaˈn Dios tuj kanem tuj jun wikxitl yol min tzˈel kniyˈ tiˈj, bix baˈn tuˈn knaˈn Dios tuya kyol n‑el kniyˈ tiˈj. Bix ko bitzel yaaˈn nuk tuya jun wikxitl yol min‑al n‑el tniyˈ tiˈj, sino juˈxa ko bitzel bix qˈuelelxix kniyˈ tiˈj kbitz. 16 Ka njaw knimsaˈn Dios tuj jun wikxitl yol min tzˈel cyniyˈ niyˈtl ocslal tiˈj, yaj tzunkej xjal min tzˈel cyniyˈ tiˈj knabl Dios, mlay cykba “Amen” te yecˈbilte baˈn tuj cywitz oj t‑xiˈ kkˈoˈn chjonte te Dios, cuma min tzˈel cyniyˈ tiˈj knabl Dios. 17 Amaloj baˈnxsen knaˈj Dios tuj jun wikxitl yol, pero ejeeˈ tzunj ocslal min tzˈel cyniyˈ tiˈj, mlay tzˈajben cye.

18 Yaltzen weya, chjonte te Dios baˈn wuˈna tuˈn nyolena tuj jun wikxitl yol min‑al n‑el tniyˈ tiˈj. Bix mas nchin yolena tuj jun wikxitl yol twitz cykilcaj ke cyey. 19 Pero cyxol ocslal mas waja nuk jweˈ yol cxeˈl nkbaˈna pero telniyˈ, twitzj oj t‑xiˈ nkˈumena laaj mil yol tuj jun wikxitl yol min‑al n‑el tniyˈ tiˈj.

20 Key hermano, oj t‑xiˈ kbisen tiˈj tuˈn tbint jun akˈuntl kuˈn, miˈntzen ko oc tisen jun neeˈ tuya knaabl, sino tisen jun xjal ma xjaltl nxiˈ tbisen tiˈj. Pero tuˈn t‑xiˈ kbinchaˈn jun kaˈ, baˈntzen tuˈn koc tisen jun neeˈ mlay bint tuˈn. 21 Cxeˈlxix cybisena tiˈj ti toc tuˈn ootxa tyol Dios tiˈj jun wikxitl yol at tuˈn tul cyxol xjal te Israel nejl. Tz̈i Kaaw cyjulu: “Ja nyola cycyˈi xjal te Israel. Juˈ tzunj cˈoquel nchkˈoˈn juntl tnom tuya jun wikxitl yol te cawlcye. Pero amale cwelet nkˈoˈna cycastiwa juˈwa, pero cycyˈi t‑xiˈ cybiˈn nyola,” tz̈i Kaaw tuj tyol Dios. 22 N‑oc kcyeˈyen tuj tyol Dios tej tpon juntl wik xjal tuya juntl wik yol cyxolj xjal min e cybi tyol Dios, minxtiiˈ oca tuˈn cyiikˈente tcawbil Dios. Yaltzen cyey tuj cywitz, jax juˈx oj kyolen tuj jun wikxitl yol min‑al n‑el tniyˈ tiˈj, qˈueleltzen baˈn tuj twitzj xjal yaaˈn ocslal, tz̈ikey. Bix tuj cywitza oj kkˈumen tyol Dios tuj tzinen, cˈajbel te jun xjal ocslal pero yaaˈn te jun xjal yaaˈn ocslal. 23 Pero yaaˈn juˈwa. Ka cykilca key ocslal nchi chmeta tuj jun lugar, bix cykilca key nchi akˈa yolel tuj jun wikxitl yol yaaˈn telniyˈ, ¿ti pjel oj tocx jun xjal yaaˈn ocslal cyxola? Qˈuelela tuj twitz njaw tuj cywiˈy. 24 Pero katzen nchi kˈumena tyol Dios tzinenxix, ojtzen tocx jun xjal yaaˈn ocslal cyxola, cˈoqueltzen tbiˈn, bix jketel tnaabl, bix qˈuelel tniyˈ tiˈj at til. 25 Cykil tzunj ewen tuˈn tanem cˈuleltzen tuj tcˈuˈj, bix cyjeltzen tkˈoˈn til, bix cwel maje naˈl Dios, bix qˈuelel tniyˈ tiˈj Diostzen at cyuyey.

26 Entonces, key hermano, jnxiˈ nkbaˈna cyey jaj oj cychmeta tuj jun culto, cab cyey bitzel, bix cabtl cyey kˈumlte tyol Dios, bix cabtl cyey kbalte ti o tyeecˈa Dios cye, bix cabtl cyey yolel tuj jun wikxitl yol min‑al n‑el tniyˈ tiˈj, bix cabtl cyey kbal ti japeninaj jun wikxitl yol. Pero cybinchama cykilca tuˈn ttzket cynaabl ocslal tuj tyol Dios. 27 Ka ma yolen juun tuj jun wikxitl yol min‑al n‑el tniyˈ tiˈj, caˈbax baˈn tyolen juˈwa, bix ka ma yolen oxe, pero oˈcx xsunj. Bix juntl, oj cyyolen xjal tuj jun wikxitl yol, miˈn chi yolen junx, sino nuk juuncˈa c‑yolel. Bix iltzen tiˈj at juntl te kbalte ti japenina cyyol. 28 Pero katzen min‑al jun baˈn ttxˈolbante ti elpenina cyyol tuj culto, miˈn chi yolen tuj wikxitl yol min‑al n‑el tniyˈ tiˈj. Mejor e cyyole cyjunalx bix tuya Dios.

29 Ja tzunkej kˈuml tyol Dios, oˈcx caˈba oxe baˈn tyolen tuj jun culto. Jatzen cabtl nuk chi ebil ti toc cyuˈn kej nchi kˈon tyol Dios, laˈ ka tumel bix ka min. 30 Bix oj nkˈon jun ocslal tyol Dios, bix nebinj juntl ocslal kˈuklecx, bix at chˈintl tumel tuya ti tten tyol Dios, iltzen tiˈj tkˈaˈj ocslal nkˈon tyol Dios ttyem tej juntl ocslal tuˈn tyolen jun rato. 31 Mas baˈn juuncˈa c‑yolel tiˈ tyol Dios tuj tumel twitzj oj tjaw nilj entera ocslal te kˈolte tyol Dios. Juˈtzen qˈuelel cyniyˈ ocslal tiˈj tyol Dios bix chi cycywixeltzen tuj cyocslabl. 32 Jnxiˈ nkˈumena jaj oj at nim cybaja cyaja chi kˈona tyol Dios tuj jun culto, ilxsen tiˈj ttxolan cyseˈ cyiiba joocˈtzen ncana cyiˈja tuˈn cyyolena, 33 cuma te Dios taj tuˈn cykilca ten tuj ttz̈yal, yaaˈn tuˈn cykil ten tuj tzpetpajlenel. Juˈ tten cyxol ocslal tuj cykilca tja Dios.

34 Bix at juntl nbaj cyxola. Ke xuuj oj min tzˈel cyniyˈ tiˈ cyyol kˈuml tyol Dios, bixsen nchi ocx te kanlte te ke cychmil ti tten, bix kaˈca jun tbiˈnc tuj culto. Ke xuuj mixbe cyyolen juˈwa tuj culto. Il tiˈj tuˈn cybinte jley ti tten tuˈn cycub ten tuj tumel tuj culto. 35 Ka cyaj xuuj tuˈn tel cyniyˈ tiˈj ti toc cyuˈn kˈuml tyol Dios, baˈn tuˈn t‑xiˈ cykanen te cychmil cyja, cuma yaaˈn baˈn tuˈn cyocx ten labtel tuj culto.

36 Yaltzen key, ¿tzimpa niyˈ tuj cycˈuˈja tiˈj ejeeˈpa tzuna e jaw itzˈjsante tyol Dios? ¿Bix tzimpa niyˈ tuj cycˈuˈja tiˈj nuk ejeeˈy n‑el cyniyˈ tiˈ tyol Dios? Ka juˈ niyˈ tuj cycˈuˈja, juˈtzen loj njaw cyniman cyiiba. 37 Ka jaxxix cyuˈna n‑el cyniˈya tiˈj alcyej jaxxix, bix ka jaxxix cyuˈna at cyipemala tuˈn t‑xiˈ cykˈumena jaxxix, qˈuelel cyniˈya tiˈj jnxiˈ ntzˈiˈbena cyey jaj tcawbil Dios. 38 Ka at jun kˈuml tyol Dios cyxola min tzˈel tniyˈ tiˈj jaxxix jnxiˈ ntzˈiˈbena cyey, miˈn tzˈoc tajlal te kbalte tyol Dios.

39 Key hermano, cykˈoˈnc cyipena tiˈj cykˈumena tyol Dios tuj tzinen, pero miˈn txiˈ cykbaˈna cye kej ocslal nchi yolen tuj jun wikxitl yol min‑al n‑el tniyˈ tiˈj tuˈn miˈn chi yolen. 40 Ja mas il tiˈj jaj tuˈn cytena tuj tumel tuj jun culto, yaaˈn tuj tzpetpajlenel.

  Back

1 of 1

You'll get this book and many others when you join Bible Gateway Plus. Learn more

Viewing of
Cross references
Footnotes