A A A A A
Bible Book List

1 CORINTIOS 10Mam de Todos Santos Chuchumatán (MVJ)

Jun naabl tuˈn miˈn chi cub maje ke ocslal cywitz ke dios cyimne

10  Key hermano, cycyeˈyenc kej ootxa xjal wiyˈjila te Israel el xeˈtke tuˈn Dios tuˈn cyil. Ejeeˈtzen xjalja e ten tjakˈ t‑xtalbil Dios. Dios e cub kˈonte jun muj cyibajxin te cˈojlal cyexin bix te kˈilx cyexin tuj cybexin. Bix Dios e cub paˈnte tej Cyak Mar tuˈntzen cyiyˈx kej xjal te Israel jlajxe. Bix oc cykˈon cyiibxin tuˈn cyxiˈ lpexin tiˈ Moisés, jxin otk takˈ Dios te nenel. Bix Dios e tzaj kˈonte cywaxin etz tz̈itj twitz cyaˈj, bix cykilcakexin e xiˈ waaˈnte. Bix Dios e tzaj kˈonte cycˈaˈxin etz itzˈj tiˈ jun xak, bix cykilcakexin e xiˈ wecˈante. Cxeˈl nkˈumena cyey tej xak etz aˈ tuj, jatzen jun techel te te Cristo, cuma e ten tipemalxin cyuya xjal. Pero amale nimet e ten ke aj Israel tjakˈ t‑xtalbil Dios, pero chˈixcˈa yaaˈn cykil xjal min el baˈn twitz Dios, bix juˈ tzunj min e ponkexin tuj txˈotxˈ otk tkba Dios, sino e cyimkexin tuj tzkij txˈotxˈ.

Juˈ tzunj, key hermano, nim cykˈoˈnc cycˈuˈja tiˈj e baj nejl. Nim kaˈ e cyajbe ke ootxa xjal wiyˈjila, bix e xiˈ tzpetkexin tuˈn. Juˈ tzunj cycˈojlam cyiiba tuˈn miˈn chi eˈla juˈxa Miˈn chi oc majey twitz sant, tisen e baj cye ke ootxa xjal wiyˈjila. Tz̈i tyol Dios cyjulu: “Tneel e cub keke twitz cysant tisen wacẍ bix akˈke waaˈl bix wcˈal, bix lwewa e jaw weˈke bixel twitz cysant tisen wacẍ,” tz̈i tyol Dios. Bix miˈn chi achena tuya pajbaj. Cˈulel tuj cycˈuˈja ke ootxa xjal te Israel wiyˈjila oc ipanke cyiˈ kej xuuj te Moab tuj pajlel, bix juˈ tzunj e tzaj tkˈoj Dios bix e cyim winak ox mil aj Israel te junx kˈij. Miˈn tzˈoc cycyakwusaˈna Dios tuya nim cyila. Juˈ e bint cyuˈnj ootxa aj Israel, ¿bix ti e baj cye? Tuˈn nimxsen nchi yaan, e tzaj tkˈoj Dios cyiˈj, bix oc tsmaˈn Dios lbaj te txˈaˈleccye, bix nimxse xjal e cyim. 10 Bix miˈn nuk chi txololona tiˈ Dios. Juˈ e baj cye wiyˈjila, bix e cyimke tuˈn Dios tuˈn t‑ángel. 11 Cykilj castiwa lu e baj cyiˈj wiyˈjila, amale nimet t‑xtalbil Dios at cyibajxin. O cyaj tzˈiˈbet tuj tyol Dios te yecˈbil te ke jaˈlewe tuj mancˈbil tyem, tuˈntzen toc kcwent tiˈj tuˈntzen miˈn ko tzpet. 12 Juˈ tzunj, alj cyey tuj cywitza mlay chi cub tzˈaka tuj il, ¡kˈoˈnc cycˈuˈja tiˈj! 13 Nuk chˈinnchˈe oj cycub tzˈaka tuˈn niyˈbebl cyiˈja. Pero kej niyˈbebl niyˈ cyxola, cyxol cykilca ocslal niˈya, yaaˈn nuk cyxol ejeeˈy ocslal tuj Corinto. Pero oj toc niyˈbebl tiˈ jun xjal, jatzen xjalja baˈn tuˈn toc ke tcˈuˈj tiˈ Dios te onlte tuˈn tweˈ twitz niyˈbebl. N‑el tniyˈ Dios tiˈj, bix mlay takˈ Dios tuˈn toc niyˈbebl tiˈ jun xjal ka mlay tziyˈx tuˈn xjal oj toc niyˈbebl tiˈj. Oj toc niyˈbebl tiˈ jun xjal, Dios cˈonlte, tuˈntzen miˈn cub tzˈak tuj il. 14 Entonces, key hermano, e xiˈke wiyˈjila tuj castiwa tuˈn oc majeke cywitz sant. Juˈ tzunj cyxomela sant.

15 Ejeeˈy xjal n‑el cyey cyniyˈ tiˈj. Juˈ tzunj cxeˈl nkˈumena jun tumel cyey. Cybisenx tiˈj ka tumel nyola bix ka min. 16 Oj t‑xiˈ kcˈaˈn santa cena te nabbil tetzlen ttz̈qˈuel Cristo tuj t‑xumlal, nko yeecˈantzen at kmojbabl kiib tuyaxin. Juˈx oj t‑xiˈ kwaaˈn juun piẍ pan te nabbilte tcyimlen Cristo, nko yeecˈantzen junx elnina koˈ tiˈ t‑xumlalxin. 17 Juˈcˈa japenina koˈ tisenj pan te santa cena chˈimacˈa n‑eˈla. Amale nbaj piẍet pero junx pan, jax juˈx ke. Amale nimet kbaj ocslal, pero junx elnina koˈ. Jpan nbaj piẍet pero junx, jatzen jun techel junx elnina koˈ tiˈ Cristo.

18 Junxitl techel cxeˈl nkˈumena cyey. Cyxol aj Israel nejl e cub cypaten ke pala alimaj te Dios twiˈ altar, bix e xiˈ cychyoˈntlxin cychuˈl alimaj. Tej t‑xiˈ cychyoˈnxin juˈwa, e xiˈ cyyeecˈanxin at cymojbabl cyiibxin tuya Dios. 19 ¿Titzen nxaˈ nkbaˈna jlu juˈwa? Min tzin nkbaˈna tecˈaxit jchiˈpj nxiˈ oyet cye sant twitzj chiˈpj min txiˈ oyet, bix min tzin nkbaˈna ejeeˈt sant at cyipemal. Jnxiˈ nkbaˈna ja te il tiˈj jaj jaaˈ nxaˈ kkˈoˈn kanem. 20 Jnxiˈ nkbaˈna kej xjal yaaˈn ocslal oj nxiˈ cyoyen jun cyoybil te jun sant, yaaˈn te Dios nxaˈ cyoyen, sino cye biman nxaˈ cyoyen. Juˈ tzunj cykˈoˈnc cycˈuˈja tiˈj tuˈn miˈn txiˈ cychyoˈna chiˈpj oˈyen cye sant, cuma ncyˈiya tuˈn cymojban cyiiba cyuya biman. 21 Mlay tuˈn tbaj cysmoˈna cˈaal cyanema tiˈ Dios bix cˈaal cyanema cyiˈ biman, pero juˈ tzin cyseˈna ka nchi nimana santa cena bix ncheˈxtla te nimal cywitz sant. 22 Oj tcub kpaˈn kanem tiˈ Dios, tzultzen tkˈoj Dios kiˈj, bix mlay weˈ tkˈoj Dios kuˈn, cuma at mas tipemalxin twitz ke kipemal. N‑oc juch tcˈuˈj Dios kiˈj, bix tajxin nuk tiˈjxin cˈoquela juch ke kcˈuˈj.

Cykil baˈn tuˈn tbint kuˈn pero yaaˈn cykilca najben

23 Jax cyuˈna cykil baˈn tuˈn tbint tuˈn jun ocslal, pero nxiˈ nkbaˈna cyey yaaˈn cykilca najben. Jacˈa bint te alcye kaj, pero yaaˈn cykilca jacˈa tzˈajben tuˈn ktz̈ˈiy tuj tyol Dios, 24 bix yaaˈn entera baˈn te yecˈbil te juntl. Cyxiˈmex alcye jun baˈn te juntl ocslal. Yaaˈn nuk chi ximela tiˈj alcye cyaja.

25 Pero oj cypona te lokˈol chiˈpj tuj qˈueybil chiˈpj, mintiiˈ il tiˈj tuˈn tbaj cykanena alcye chiˈpj otk txˈaj oybaj twitz sant. Ka mintiiˈ tumel cyuyey ka oˈyen chiˈpj cye sant bix ka min, mintiiˈ tuˈn tbaj cycˈuˈja tiˈj, 26 cuma cykilca wikan chiˈpj o tzaj tkˈoˈn Dios ke. Tz̈i tyol Dios cyjulu: “Entera twitz txˈotxˈ tuyax cykilca at twitz txˈotxˈ ntzaj tkˈoˈn Dios,” tz̈i tyol Dios.

27 Katzen ma ttxoc jun xjal yaaˈn ocslal ejeeˈy te waaˈl tuya, ka cyaja cheˈxa, baˈn tuˈn cyxiˈy, bix baˈn tuˈn t‑xiˈ cychyoˈna laˈ alcye chiˈpj ctzaal kˈoˈn cyey. Miˈn chi oca te kanlte ka otk txˈaj oyet chiˈpj twitz sant bix ka min. 28 Pero ka ma tkˈumen jun xjal te cyey, “Oˈyen tej chiˈpj lu cye sant,” ka tz̈i juˈwa, miˈn txiˈ cychyoˈna jchiˈpj, tuˈn miˈn cybinchay jun il tuj twitzj xin nkˈumente. 29 Pero n‑el kniyˈ tiˈj nuk te te texin il tuj twitzxin, yaaˈn te cyey.

Pero cxeˈl cykbaˈna yaaˈn tumel tuˈn miˈn txiˈ cychyoˈna chiˈpj nuk tuˈn tyol juntl, 30 bix yaaˈn tumel oj toc ten juntl xjal yolel cyiˈja oj t‑xiˈ cytz̈iybeˈna alcye ntzaj tkˈoˈn Dios cyey bix nxiˈ cykˈoˈna chjonte te Dios tiˈj. 31 Jax cyuˈna cykilca chiˈpj baˈn tuˈn t‑xiˈ kchyoˈn. Pero cxeˈl nkbaˈna cyey, amale baˈnt tuˈn t‑xiˈ kchyoˈn cykilca, bix tuˈn t‑xiˈ kcˈaˈn cykilca, bix tuˈn t‑xiˈ kbinchaˈn cykilca, mas il tiˈj tuˈn kajben te Dios twitzj tuˈn tbint cykilca kuˈn. 32 Juˈ tzunj miˈn cub kyeecˈan jun kbinchbil tuˈn tcub tzˈak juntl tuj il kuˈn, mi nuk jun judío bix mi nuk jun yaaˈn judío bix mi nuk jun ocslal. 33 Juˈ nbint wuˈna. Tiˈj cykilca nbint wuˈna, nchin jyona tuˈntzen wajbena te cykilca xjal. Mintiiˈ nbint wuˈna nuk jaj baˈn te weya, sino jaj baˈn te cykilca, tuˈntzen cyclet.

  Back

1 of 1

You'll get this book and many others when you join Bible Gateway Plus. Learn more

Viewing of
Cross references
Footnotes