A A A A A
Bible Book List

1 इतिहास 29Awadhi Bible: Easy-to-Read Version (ERV-AWA)

मन्दिर बनावइ बरे भेंट

29 राजा दाऊद हुवाँ एक संग बटुरे इस्राएल क सबहिं लोगन स कहेस, “परमेस्सर मोरे पूत सुलैमान क चुनेस। सुलैमान बालक अहइ अउर उ ओन सब बातन क नाहीं जानत जेनकर जरूरत ओका इ काम क करइ बरे अहइ। किन्तु काम बहोत महत्वपूर्ण अहइ। इ भवन लोगन क बरे नाहीं अहइ अपितु यहोवा परमेस्सर क बरे अहइ। मइँ आपन पूरी सक्ती स परमेस्सर क मन्दिर बनावइ क चिजियन क प्रबंध किहेउँ ह। मइँ सोना स बनइवाली चिजियन बरे सोना दिहेउँ ह। मइँ चाँदी स बनइवाली चिजियन क बरे चाँदी दिहेउँ ह। मइँ काँसा स बनइवाली चिजियन क बरे काँसा दिहेउँ ह। मइँ लोहा स बनइवाली चिजियन क बरे लोहा दिहेउँ ह। मइँ काठे स बनइवाली चिजियन क बरे काठ दिहेउँ ह। मइँ नीलमणि, रतनजटित फकनन क बरे बिभिन्न रंग क सबहिं प्रकार क कीमती रतन अउ सफेद संगमरमर भी दिहउँ ह। मइँ यहोवा क मन्दिर क बनावइ बरे इ सबइ चिजियन बहोत जियादा संख्याँ मँ दिहेउँ ह। मइँ अपने परमेस्सर क मन्दिर बरे सोना अउ चाँदी क एक बिसेस भेंट देत अहइँ। मइँ इ एह बरे करत हउँ कि मइँ फुरइ अपने परमेस्सर क मन्दिर क बनावइ चाहत हउँ। मइँ इ पवित्तर मन्दिर क बनावइ बरे एन सब चिजियन क देत हउँ। मइँ ओपीर स एक सौ दस टन सुद्ध सोना दिहेउँ ह। मइँ दुई सौ साठ टन सुद्ध चाँदी दिहेउँ ह। चाँदी मन्दिर क भवनन क देवारन क ऊपर मढ़इ बरे अहइ। मइँ सोना अउ चाँदी ओन सब चिजियन बरे दिहेउँ ह जउन सोना अउर चाँदी क बनी होत हीं। मइँ सोना अउ चाँदी दिहेउँ ह जेनसे वुसल कारीगर मन्दिर क बरे सबहिं विभिन्न तरह क चिजियन बनाइ सकइँ। अब आप लोगन मँ स केतने आजु यहोवा क काम बरे योगदान देइ बरे तइयार अहइँ?”

परिवारन क प्रमुख, इस्राएल क परिवार समूहन क प्रमुख, उच्च अधिकारियन, कप्तान लोगन अउर राजा क काम करइ क बरे जिम्मेदार अधिकारी सबहिं तइयार रहेन अउर उ पचे कीमती चिजियन दिहन। इ सबइ उ सब चिजियन अहइँ जउन उ पचे परमेस्सर क घर क बरे दिहन: एक सौ नब्बे टन सोना, तीन सौ पचहत्तर टन ऐ चाँदी, छ: सौ पचहत्तर टन ऐ काँसा; तीन हजार सात सौ पचास टन ऐ लोहा; जउने लोगन क लगे कीमती रतन रहेन, उ पचे एका यहोवा क मन्दिर क खज़ाना मँ जउन यहीएल क सुरच्छा मँ रहेन, दिहेन। यहीएल गेर्सोन क परिवार स रहा। लोग बहोत खुस रहेन। काहेकि ओनकर प्रमुख ओतना जियादा देइ मँ खुस रहेन। प्रमुख स्वतंत्रता पूर्वक खुले दिल स देइ मँ खुस रहेन। राजा दाऊद भी बहोत खुस रहा।

दाऊद क सुन्नर पराथना

10 तब दाऊद ओन लोगन क समन्वा, जउन हुवाँ एक संग बटुरे रहेन, यहोवा क बड़कई किहन। दाऊद कहेस:

“यहोवा इस्राएल क परमेस्सर, हमार बाप,
    सदा-सदा बरे तोहार स्तुति होइ।
11 महानता, सक्ती, यस बिजइ अउर प्रतिस्ठा तोहार अहइ।
    काहेकि हर एक चीज धरती अउर आसमान क तोहार ही अहइ।
हे यहोवा! राज्ज तोहार अहइ:
    तू हर एक क ऊपर सासक अहा।
12 सम्पत्ति अउर प्रतिस्ठा तोहसे अवत ह।
    तोहार सासन हर चीज पइ अहइ।
तू सक्ती अउर बल अपने हाथे मँ रखत ह।
    तोहरे हाथे मँ सक्ती अहइ कि तू कउनो क भी महान अउर सक्तीसाली बानावइ सकत ह।
13 अब, हमार परमेस्सर हम तोहका धन्यवाद देत अही,
    अउर हम तोहरे यसस्वी नाउँ क स्तुति करत अही।
14 इ सबहिं चिजियन ओहसे अउर मोरे लोगन स नाहीं आइ अहइँ।
    इ सबइ सबहिं चिजियन तोहसे आइन
    अउर हम तोहका उ सबइ चिजियन दिहेउँ जउन तोहसे आई अहइँ।
15 हम पचे ठीक अपने पुरखन क नाईं
    इ संसार मँ तोहरे समन्वा बिदेसी क तरह रहत हउँ।
इ धरती पइ हमार समइ बिना उम्मीद क
    छाया क नाईं गुज़रत अहइ।
16 हे यहोवा हमार परमेस्सर, हम इ सबइ चिजियन तोहार मन्दिर बनवइ बरे बटोरेन ह।
    हम लोग तोहार मन्दिर तोहार नाउँ क सम्मान बरे बनाउब।
मुला इ सबइ चिजियन तोहसे आई अहइँ
    अउर हर चीज तोहर अहइ।
17 मोर परमेस्सर, मइँ इ भी जानत हउँ तू लोगन क हिरदइ क जाँच करत ह,
    अउर तू खुस होत ह,
जदि लोग अच्छे काम करत हीं,
    मइँ सच्चे हिरदइ स इ सबइ चिजियन देइ मँ खुस रहेउँ।
अब मइ तोहरे लोगन क हुवाँ बटुरा लखइ सकत हउँ
    जउन इ सबइ चिजियन तोहका देइ मँ खुस अहइँ।
18 हे यहोवा, तू परमेस्सर अहा
    हमार पुरखा इब्राहीम, इसहाक अउ इस्राएल क।
वृपा कइके तू लोगन क मदद सही जोजना बनावइ मँ कइके
    ओनका तोहरे बरे बिस्सास जोग्ग अउर सच्चा होइ मँ करा।
19 अउर मोरे पूत सुलैमान क तोहरे बरे सच्चा होइ मँ मदद द्या
    तोहार कानून, नेमन अउर आदेसन क सर्वदा पालन करी मँ मदद द्या।
ओन कामन क करइ मँ सुलैमान क मदद करा
    अउर उ सानदार महल क बनावइ मँ ओकर मदद करा जेकर जोजना मइँ बनाएउँ ह।”

20 तब दाऊद हुवाँ एक संग बटुरे सबहिं समूहन क लोगन स कहेस, “अब यहोवा, अपने परमेस्सर क स्तुति करा।” एह बरे सब यहोवा परमेस्सर, उ परमेस्सर क जेकर आराधना ओनकर पुरखन किहेन, स्तुति किहस। उ पचे यहोवा तथा ओकर राजा क सम्मान देइ क बरे धरती पइ माथा टेकिके प्रणाम किहन।

सुलैमान राजा होत ह

21 अगले दिन लोगन यहोवा क बलि भेंट किहन। उ पचे यहोवा क होमबलि भेंट किहेन। उ पचे एक हजार बैल, एक हजार भेड़न एक हजार मेमनन भेंट क रूप मँ दिहन अउर उ पचे पेयबलि भी भेंट किहेन। इस्राएल क सबइ लोगन बरे हुवाँ अनेक बलिदान दिए गएन। 22 उ दिन लोग खाएन अउर पीएन अउर यहोवा हुवाँ ओनके संग रहा उ पचे बहोत खुस रहेन।

अउर पचे दाऊद क पूत सुलैमान क दूसरी दाईं राजा बनाएन। उ पचे सादोक क अभिसेक राजा क रूप मँ किहन अउर उ पचे सादोक क अभिसेक याजक बनवावइ बरे किहन। उ पचे इ उ जगह पइ किहन जहाँ यहोवा रहा।

23 तब सुलैमान राजा क रूप मँ यहोवा क सिंहासन पइ बइठा सुलैमान अपने बाप क जगह लिहस। सुलैमान बहोत सफल रहा। इस्राएल क सबहिं लोगन सुलैमान क आदेस मानत रहेन। 24 सबहिं प्रमुख, फउजी अउर राजा दाऊद क सबहिं पूतन सुलैमान क राजा क रूप मँ स्वीकार किहन अउर ओकरी आग्या क पालन किहन। 25 यहोवा सुलैमान क बहोत महान बनाएस। इस्राएल क सबहिं लोग जानत रहेन कि यहोवा सुलैमान क महान बनावत अहइ। यहोवा सुलैमान क उ सम्मान दिहस जउन एक राजा क मिलइ चाही। यहोवा सुलैमान क साही प्रताप दिहेस जउन पहिले इस्राएल क कउनो राजा क नाहीं मिला।

दाऊद क मउत

26-27 यिसै क पूत दाऊद पूरे इस्राएल पइ चालीस बरिस तलक राजा रहा। दाऊद हेब्रोन नगर मँ सात बरिस तलक राजा रहा। तब दाऊद यरूसलेम मँ तैंतीस बरिस तलक राजा रहा। 28 दाऊद तब मरा जब उ बूढ़ा रहा। दाऊद एक नीक लम्बी जिन्नगी बिताएस। दाऊद क लगे बहोत सम्पत्ति अउ प्रतिस्ठा रही अउर दाऊद क पूत सुलैमान ओकरे पाछे राजा बना।

29 उ सबइ कार्य, जउन सुरू स लइके आखिर तलक दाऊद किहस, समूएल दसीर् क रचना मँ अउर नातान नबी क रचना मँ अउ गाद दसीर् क रचना मँ लिखे गएन ह। 30 उ सबइ रचना इस्राएल क राजा क रूप मँ दाऊद जउन काम किहेस ओन सब क सूचना देत ह। उ सबइ दाऊद क सक्ती अउर ओकरे संग जउन घटा, ओकरे बिसय मँ भी बतावत हीं, अउर उ सबइ इस्राएल अउ ओकरे चारिहुँ कइँती क राज्जन मँ जउन भवा, ओकरे बारे मँ बतावत ह।

Awadhi Bible: Easy-to-Read Version (ERV-AWA)

Awadhi Bible: Easy-to-Read Version Copyright © 2005 World Bible Translation Center

  Back

1 of 1

You'll get this book and many others when you join Bible Gateway Plus. Learn more

Viewing of
Cross references
Footnotes