A A A A A
Bible Book List

1 इतिहास 15Awadhi Bible: Easy-to-Read Version (ERV-AWA)

करार क सन्दूख यरूसलेम मँ

15 दाऊद, अपने बरे दाऊद नगर मँ महल बनवाएस। तब उ करार क सन्दूख क बरे एक ठु जगहिया बनाएस। उ एकरे बरे एक तम्बू डाएस। तब दाऊद कहेस, “सिरफ लेवीबंसियन क करार क सन्दूख लइ चलइ क मंजूरी अहा। यहोवा ओनका करार क सन्दूख चलइ अउर ओकर सदा ही सेवा बरे चुनेस ह।”

दाऊद इस्राएल क सबहिं लोगन क यरूसलेम मँ एक संग मिलइ बरे बोलाएस जब तलक लेवीबंसियन करार क सन्दूख क उ जगहिया पइ लइके आएन जउन उ ओकरे बरे बनाए रहा। दाऊद हारून क सन्तानन अउ लेवीबंसियन क एक संग बोलाएस।

कहात परिवार समूह स एक सौ बीस मनई रहेन। ऊरीएल ओनकर प्रमुख रहा।

मरारी क परिवार समूह स दुई सौ बीस मनई रहेन। असायाह ओनकर प्रमुख रहा।

गेर्सोमियन क परिवार समूह क एक सौ तीस लोग रहेन। योएल ओनकर प्रमुख रहा।

एलिसापान क परिवार समूह क दुई सौ लोग रहेन। समायाह ओनकर प्रमुख रहा।

हेब्रोन क परिवार समूह क सत्तर लोग रहेन। एलीएल ओनकर प्रमुख रहा।

10 उज्जीएल क परिवार समूह क एक सौ बारह लोग रहेन। अम्मीनादाब ओनकर प्रमुख रहा।

याजक अउ लेवीबंसियन स दाऊद बातन करत ह

11 तब दाऊद सादोक अउ एब्यातार याजकन स कहेस कि उ पचे ओकेरे लगे आवइँ। दाऊद ऊरीएल, असायाह, योएल, समायाह, एलीएल अउर अम्मीनादाब लेवीबंसियन क भी अपने लगे बोलाएस। 12 दाऊद ओनसे कहेस, “तू लोग लेवी परिवार समूह क प्रमुख अहा। तू पचन्क अपने अउर दूसर लेवीबंसियन क पवित्तर बनावइ चाही। तब करार क सन्दूख क उ जगह पइ लिआवा, जेका मइँ ओकरे बरे बनाएउँ ह। 13 पिछली दाईं हम लोग यहोवा परमेस्सर स नाहीं पूछा कि करार क सन्दूख क हम कइसे लइ चली। लेवीबंसियन, तू पचे एका नाहीं लइ चल्या, इहइ कारण अहइ कि यहोवा हम क सजा दिहस।”

14 तब याजक अउ लेवीबंसियन अपने क पवित्तर किहन जेहसे उ पचे इस्राएल क यहोवा परमेस्सर क सन्दूख क लइके चल सकइँ। 15 लेवीबंसियन बिसेस डंडन क उपयोग, अपने काँधन पइ करार क सन्दूख क लइ चलइ बरे किहन जइसा मूसा क आदेस रहा। उ पचे सन्दूख क उ तरह स लइ चलेन जइसा यहोवा कहे रहा।

गायक

16 दाऊद लेवीबंसियन क ओनके गायक भाइयन क लिआवइ बरे कहेस। गायकन क अपनी वीणा, तम्बूरा अउर मंजीरा लिआउब रहा अउर खुसी क गीत गाउब रहा।

17 तब लेवीबंसियन हेमान अउर भाइयन आसाप अउ एतान क बोलाएन। हेमान योएल क पूत रहा। आसाप बेरेक्याह क पूत रहा। एतान वूसायाह क पूत रहा। इ सबइ मनई मरारी परिवार समूह क रहेन। 18 हुवाँ लेवीबंसियन क दूसर समूह भी रहा। उ पचे जकर्याह, बेन याजीएल, समीरामोत, यहीएल, उन्नी, एलीआब, बनायाह, मासेयाह, मत्तित्याह, एलीपलेह, मिकनेयाह, ओबेदेदोम अउ यीएल रहेन। इ सबइ लोग लेवीबंस क रच्छक रहेन।

19 गायक हेमान, आसाप अउ एतान काँसे क मँजीरा बजावत रहेन। 20 जकर्याह, अजीएल, समीरामोत, यहीएल, उन्नी, एलीआब, मासेयाह अउ बनायाह, अलामोत वीणा बजावत रहेन। 21 मत्तित्याह, एलीपलेह, मिकनेयाह, ओबेदेदोम, यीएल अउर अजज्याह सेमिनिथ तम्बूरा बजावत रहेन। इ ओनकर सदा ही क काम रहा। 22 लेवीबंसी प्रमुख कनन्याह गायन क प्रबन्धक रहा। कनन्याह क इ काम मिला रहा काहेकि उ गावइ मँ बहोत जियादा वुसल रहा।

23 बेरेक्याह अउ एलकाना, करार क सन्दूख क रच्छकन मँ स दुइ रहेन। 24 याजक सबन्याह, योसापात, नतनेल, अमासै, जकर्याह, बनायाह अउर एलीएजेर क काम करार क सन्दूख क समन्वा चलत समइ तुरही बजाउब रहा। ओबेदेदोम अउर यहिय्याह करार क सन्दूख बरे दूसर रच्छक रहेन।

25 दाऊद इस्राएल क अग्रज अउ सेनापति करार क सन्दूख क लेइ गएन। उ पचे ओका ओबेदेदोम क घरे स बाहेर लिआएन। हर एक बहोत खुस रहा। 26 परमेस्सर ओन लेवीबंसियन क मदद किहस जउन यहोवा क करार क सन्दूखे क लइके चलत रहेन। उ पचे सात बर्धन अउर सात भेड़न क बलि दिहन। 27 सबहिं लेवीबंसी जउन करार क सन्दूख लइके चलत रहेन, उत्तिम सन क चोगे पहिरे रहेन। गायन क प्रबन्धक कनन्याह अउर सबहिं गायक उत्तिम सन चोगान पहिरे रहेन अउ दाऊद भी उत्तिम सन क बना एपोद पहिरे रहा।

28 इ तरह इस्राएल क सारे लोग यहोवा क करार क सन्दूख क लइ आएन। उ पचे उद्घोष किहन, उ पचे भेड़न क सींग अउ तुरही बजाएन अउर उ पचे मँजीरन, वीणा अउर तम्बूरन बजाएन।

29 जब करार क सन्दूख दाऊद नगर मँ पहोंचा, मीकल खिड़की स लखेस। मीकल साऊल क बिटिया रही। उ राजा दाऊद क चारिहुँ कइँती नाचत अउर बजावत लखेस। उ अपने हिरदइ मँ दाऊद क बरे सम्मान क खोइ दिहस उ सोचेस कि उ मूरख बनत बाटइ।

Awadhi Bible: Easy-to-Read Version (ERV-AWA)

Awadhi Bible: Easy-to-Read Version Copyright © 2005 World Bible Translation Center

  Back

1 of 1

You'll get this book and many others when you join Bible Gateway Plus. Learn more

Viewing of
Cross references
Footnotes