A A A A A
Bible Book List

1 इतिहास 13Awadhi Bible: Easy-to-Read Version (ERV-AWA)

करार क सन्दूख क वापस लिआउब

13 दाऊद अपनी फउज क सबहिं अधिकारियन स बात किहस। तब दाऊद इस्राएल क सबहिं लोगन क एक संग बोलाएस। उ ओनसे कहेस: “जदि तू लोग एक नीक बिचार सुमझत अहा। अउर जदि इ उहइ अहइ जेका यहोवा चाहत ह, तउ हम लोग अपने भाइयन क इस्राएल क सबहिं छेत्रन मँ सँदेस पठइ। हम लोग ओन जादकन अउ लेवीबंसियन क भी सँदेस पठइ जउन हम लोगन क भाइयन क संग नगरन अउ ओनके निअरे क खेतन मँ रहत हीं। सँदेसा मँ ओनसे आवइ अउर हमार साथ देइ क कहा जाइ। हम लोग करार क सन्दूख क यरूसलेम मँ अपने मँ अपने लगे वापस लिआइ। हम लोग करार क सन्दूख क देखभाल साऊल क सासन काल मँ नाहीं कीन्ह।” एह बरे इस्राएल क सबहिं लोग दाऊद क सलाह स्वीकार किहन। ओन सबहिं इ विचार किहेन कि इहइ करब ठीक अहइ।

एह बरे दाऊद मिस्र क सीहोर नदी स हमात क प्रवेस दुआर तलक क सबहिं इस्राएल क लोगन क बटोरेस। उ पचे किर्यत्यारीम नगर स करार क सन्दूख क वापस लइ जाइ क बरे एक संग आएन। दाऊद अउ इस्राएल क सबहिं लोग ओकरे संग यहूदा क बाला क गएन। (बाला किर्यत्यारीम क दूसर नाउँ अहइ।) उ पचे हुवाँ करार क सन्दूख क लिआवत बरे गएन। उ करार क सन्दूख यहोवा परमेस्सर क सन्दूख अहइ। उ करूब सरगदूत क ऊपर बइठत ह। इहइ सन्दूख अहइ जउन यहोवा क नाउँ स गोहराइ जात ह।

लोग करार क सन्दूख अबीनादाब क घरे स हटाएन। उ पचे ओका एक नई गाड़ी मँ रखेन। उज्जा अउ अह्यो गाड़ी क चलावत रहेन।

दाऊद अउ इस्राएल क सबहिं लोग परमेस्सर क सम्मुख उत्सव मनावत रहेन। उ पचे परमेस्सर क स्तुति करत रहेन अउ गीत गावत रहेन। वे पचे वीणा तम्बूरा, दोत, मंजीरा अउ तुरही बजावत रहेन।

उ पचे कीदोन क खरिहाने मँ आएन। गाड़ी हींचइवाले बर्धन क ठोकर लाग अउ करार क सन्दूख लगभग भहराइ गवा। उज्जा सन्दूख क धरइ बरे आपन हाथ आगे बढ़ाएस। 10 यहोवा उज्जा पइ बहोत जियादा कोहाइ गवा। यहोवा उज्जा क मार डाएस काहेकि उ सन्दूख क छुइ लिहस। इ तरह उज्जा परमेस्सर क समन्वा हुवाँ मरा। 11 परमेस्सर आपन किरोध उज्जा पइ देखाएल अउर एहसे दाऊद कोहाइ गवा। उ समइ स अब तलक उ जगह “पेरेसउज्जा” कही जात ह।

12 उ दिन दाऊद परमेस्सर स डेराइ गवा। दाऊद कहेस, “मइँ करार क सन्दूख क हिआँ अपने लगे नाहीं लिआइ सकत।” 13 उ एह बरे दाऊद करार क सन्दूख क अपने संग दाऊद नगर मँ नाहीं लइ गवा। उ करार क सन्दूख क ओबेद-एदोम क घर पइ तजेस। ओबेद-एदोम गत नगर स रहा। 14 करार क सन्दूख ओबेद-एदोम क परिवार मँ ओकरे घरे मँ तीन महीने रहा। यहोवा ओबेद-एदोम क परिवार अउर ओकरे हिआँ जउन कछू रहा, क आसीर्बाद दिहस।

Awadhi Bible: Easy-to-Read Version (ERV-AWA)

Awadhi Bible: Easy-to-Read Version Copyright © 2005 World Bible Translation Center

  Back

1 of 1

You'll get this book and many others when you join Bible Gateway Plus. Learn more

Viewing of
Cross references
Footnotes