यर्मिया 47

Nepali Bible: Easy-to-Read Version

² परमप्रभु भन्नुहुन्छ:
“हेर, शत्रुका सिपाहीहरू उत्तरमा भेला भइरहेकाछन्।
    तिनीहरू किनारमा छालले हिर्काउँदै उर्लेको नदी जस्तै आउनेछन्।
तिनीहरूले बाढीले झैं सारा देश शहरहरू
    र त्यहाँ बस्ने मानिसहरू ढाक्नेछन्।
त्यस देशका मानिसहरूले विलौना गर्नेछन्
    तथा गुहार माग्नेछन्।
³ तिनीहरूले घोडाहरू दौडेको टापहरू सुन्ने छन्,
    तिनीहरूले रथहरू दौडाइएको तेज आवाजहरू सुन्नेछन्,
    तिनीहरूले चक्काको गुडुल्किएको आवाज सुन्ने छन्।
बाबुहरू आफ्ना नानीहरू जोगाउन असमर्थ हुनेछन्।
    तिनीहरू अति नै कमजोर हुनेछन्।
⁴ सोर अनि सिदोनलाई सहायता गर्न सक्ने
    त्यहाँ रहेका प्रत्येक जिउँदालाई टुक्राउनको लागि
पलिश्तीलाई सर्वनाश पार्ने समय आएको छ।
पलिश्तीहरू र कप्तोर टापुमा रहेका मानिसहरू सबैलाई
    परमप्रभुले नष्ट गर्नु हुनेछ।
⁵ गाजाका मानिसहरूले आफ्नो केश खौरन्छन्।
अश्कलोनका मानिसहरू चूपचाप रहन्छन्।
    हे बेंसीमा बाँच्नेहरू हो!
    कहिलेसम्म तिमीहरू स्वयंलाई काट्नेछौ?