Add parallel Print Page Options

यहूदा क राजा

13 जब राजा यारोबाम इस्राएल क राजा क रुप मँ अट्ठारहवें बरिस मँ रहा अबिय्याह यहूदा क नवा राजा बना। अबिय्याह यरूसलेम मँ तीन बरिस तलक राजा रहा। गिबा नगर क ऊरीएल क बिटिया, मीकायाह अबिय्याह क महतारी रही। अउर हुवाँ अबिय्याह अउर यारोबाम क बीच जुद्ध चलत रहा। अबियाह क फउज मँ चार लाख वीर सैनिक रहेन। अबियाह जुद्ध बरे आपन फउज मँ गएन। यारोबाम अबिय्याह क खिलाफ जुद्ध बरे तइयारी किहस। ओकरे लगे आठ लाख वीर सैनिक रहेन।

तब अबिय्याह एप्रैम क पर्वतीय पहँटा मँ समारैम पर्वत पइ खड़ा भवा। अबिय्याह कहेस, “यारोबाम अउर सारे इस्राएल मोर बात सुना। तू लोगन क जानइ चाही कि यहोवा, इस्राएल क परमेस्सर दाऊद अउर ओकरी सन्तानन क इस्राएल सासन करइ क अधिकार दिहस ह। यहोवा दाऊद क इ अधिकार सास्वत करार क संग दिहस। किन्तु यारोबाम अपने सुआमी क खिलाफ होइ गवा। यारोबाम जउन नबात क पूत रहा, दाऊद क पूत सुलैमान क अधिकारियन मँ स एक रहा। तब निकम्मे, बुरे मनइयन यारोबाम क मीत होइ गएन अउर यारोबाम अउर उ सबइ बुरे मनइयन सुलैमान क पूत रहूबियाम क खिलाफ होइ गएन। रहूबियाम जुवक रहा अउर ओका अनुभव नाहीं रहा। एह बरे रहूबियाम यारोबाम अउर ओकरे बुरे मीतन क रोकने न सका।

“तू लोग परमेस्सर क राज्ज, जउन दाऊद क पूतन क जरिये सासित अहइ, हरावइ क जोजना बनाया ह। तू लोगन क गनती बहोत अहइ अउर यारोबाम क तोहरे बरे बनावा गवा सोने क बछवा तोहार ‘इस्सर’ अहइ। तू लोग हारून क संतानन यहोवा क याजकन अउ लेवीबंसियन क बाहेर फेंकि दिहेस ह। तू पचे पृथ्वी क दूसर देसन क समान अपने याजकन क चुन्या ह। तब तउ कउनो भी मनई जउन एक जुवक बर्धा अउर सात ठु भेड़न लिआवइ, ओन ‘अइसन देवतन क जउन परमेस्सर ह ही नाही’ क सेवा करइवाला याजक बन सकत ह।

10 “किन्तु जहाँ तलक हमार बात अहइ यहोवा हमार परमेस्सर अहइ। हम यहूदा क निवासी लोग यहोवा क आग्या पालन स इन्कार किहा नाहीं ह। हम लोग ओका तजा नाहीं ह। जउन याजक यहोवा क सेवा करत हीं, उ पचे हारून क सन्तान अहइँ अउर लेवीबंसी यहोवा क सेवा करइ मँ याजकन क मदद करत हीं। 11 उ पचे होमबलि चढ़ावत हीं अउर धूपे क सुगन्धि यहोवा क हर भिंसारे साँझ बारत हीं। उ पचे मन्दिर मँ बिसेस मेज पइ रोटियन कतारन मँ रखत भी अहइँ अउर उ पचे सोना क डीबट पइ रखे भए दीपकन क देख भाल करत हीं ताकि हर साँझ क उ प्रकास क संग चलइ। हम लोग यहोवा, अपने परमेस्सर क सेवा सावधानी क संग करित ह। किन्तु तू लोग ओका तजि दिहा ह। 12 खुद परमेस्सर हम लोगन क संग अहइ। उ हमार सासक अहइ अउर ओकर याजक हमरे संग अहइँ। परमेस्सर क याजक आपन तुरही तोहका जगावइ अउर तोहका ओकरे लगे आवइ क उत्साहित करइ क बरे फूँकत हीं। ऐ इस्राएल क लोगो, अपने पुरखन क यहोवा, परमेस्सर क खिलाफ जिन लड़ा। काहेकि तू कामयाब नाहीं होब्या।”

13 किन्तु यारोबाम फउजियन क एक टुकड़ी क चुपके-चुपके गुप्त रूप स अबिय्याह क फउज क पाछे पठएस, इ तरह स जब यारोबाम क फउज अबिय्याह क फउज क समन्वा रही तब यारोबाम क फउज क गुप्त फउजी अबिय्याह क फउज क पाछे रही। 14 जब अबिय्याह क यहूदा क फउजियन चारिहुँ कइँती लखेन तउ उ पचे यारोबाम क फउज क आगे अउर पाछे स हमला करत पाएन। तउ यहूदा क लोग यहोवा क जोर स गोहराएन अउर याजकन तुरहियन बजाएन। 15 तब अबिय्याह क फउज क लोग चिचियाएस। जब यहूदा क लोग चिचियाएस तउ परमेस्सर यारोबाम क फउज क हराइ दिहस। यारोबाम क इस्राएल क सारी फउज क अबिय्याह क यहूदा क फउज क जरिये हराइ दीन्ह गइ। 16 इस्राएल क लोग यहूदा क लोगन क समन्वा भाग पराइ गएन। परमेस्सर यहूदा क फउज क जरिये इस्राएल क फउज क हरवाइ दिहस। 17 अबिय्याह क फउज इस्राएल क फउज क बुरी तरह हराएस अउर इस्राएल क पाँच लाख उत्तिम फउज मारे गएन। 18 इ तरह उ समइ इस्राएल क लोग पराजित अउर यहूदा क लोग बिजयी भएन। यहूदा क फउज बिजयी भइ काहेकि उ अपने पुरखन क परमेस्सर, यहोवा पइ निर्भर रही।

19 अबियाह क फउज यारोबाम क फउज क पाछा किहस। अबियाह क फउज यारोबाम स बेतेल, यसाना अउ एप्रोन नगरन पइ कब्जा कइ लिहेस। उ पचे ओन नगरन अउर ओनके आस पास क नान्ह गाँवन पइ अधिकार कइ लिहस।

20 यारोबाम जियादा सक्तीसाली फुन कबहुँ नाहीं भवा जब तलक अबिय्याह जिअत रहा। यहोवा यारोबाम क मार डाएस। 21 किन्तु अबिय्याह सक्तीसाली होइ गवा। उ चौदह मेहररुअन स बियाह किहस अउर उ बाईस पूतन अउ सोरह बिटियन क बाप रहा। 22 दूसर जउन कछू अबिय्याह किहस, उ इद्दो नबी क किताबन मँ लिखा अहइ।