A A A A A
Bible Book List

दूसर इतिहास 5Awadhi Bible: Easy-to-Read Version (ERV-AWA)

तब सुलैमान यहोवा क मन्दिर क बरे कीन्ह गए सबहिं काम पूरे कइ लिहस। सुलैमान ओन सबहिं चिजियन क लिआएस जउन ओकर बाप दाऊद क मन्दिर बरे दिहे रहा। सुलैमान सोना चाँदी क बनी भइ सबहिं चिजियन अउर सबहिं फनिर्चरन (लकड़ी स बना भवा चिजियन) क लिआएन। सुलैमान ओन सबहिं चिजियन क परमेस्सर क मन्दिर क खाजना मँ रखेस।

पवित्तर सन्दूख मन्दिर मँ पहोंचावा गवा

सुलैमान इस्राएल क सबहिं परिवार समूहन क प्रमुखन अउर परिवारन क एकट्ठा किहेस। उ सबहिं क यरूसलेम मँ बटोरेस। सुलैमान इ एह बरे किहस कि लेवी बंसी यहोवा क करार क सन्दूख क दाऊद क नगर स लाई सकइँ, जउन सिय्योन अहइ। राजा सुलैमान इस्राएल क सबहिं लोगन क संग महीने क वुटीर क त्यौहार पइ जमा भएस।

जब इस्राएल क सबहिं बुर्जुगन आइ गएन तब लेवीबंसियन करार क सन्दूख क उठाएस। तब याजक अउर लेवीबंसी करार क सन्दूख क मन्दिर मँ लइ गएन। उ पचे मिलापवाले तम्बू अउ एहमाँ जउन पवित्तर चिजियन रहिन ओनका भी यरूसलेम लइ आएन। राजा सुलैमान अउ इस्राएल क सबहिं लोग करार क सन्दूख क समन्वा मिलेन। राजा सुलैमान अउ इस्राएल क सबहिं लोग भेड़िन अउ बर्धन क बलि चढ़ाएन। हुवाँ ऍतने जियादा भेड़न अउ बर्धन रहेन कि कउनो मनई ओनका गन नाहीं सकत रहा। तब याजकन यहोवा क करार क सन्दूख क उ जगह पइ रखेन, जउन एकरे बरे तइयार कीन्ह गवा रहा। उ सब स जियादा पवित्तर जगह मन्दिरे क भीतर रही। करार क सन्दूख क करूब सरगदूत क पखनन क खाले धरा गवा। करार क सन्दूख क जगह क ऊपर करूब सरगदूतन क पखनन फइले भए रहेन, करूब सरगदूत करार क सन्दूखे क ऊपर अउर बल्लियन क ऊपर जउन सन्दूख क लइ जाइ मँ प्रयोग आवत होत ह, खड़े रहेन। बल्लियन ऍतनी लम्बी रहिन कि महा पवित्तर ठउर क समन्वा स ओनकर सिरन क लखे जाइ सकतेन। मुला ओनका मन्दिर क बाहेर स कउनो नाहीं लखत सकतेन। बल्लियन, आजु तलक हुवाँ अहइँ। 10 करार क सन्दूख मँ दुई ठू पाथर क सिलन क अलावा दूसर कछू नाहीं रखा रहा। मूसा दुइनउँ सिलन क होरेब पर्वत पइ करार क सन्दूख मँ रखे रहा। होरेब उ जगह रही जहाँ परमेस्सर इस्राएल क लोगन क संग जब उ पचे मिस्र छोड़ दिहे रहेन। एक करार किहे रहा।

11 सबहिं याजक जउन हुवाँ रहेन आपन आप क सुद्ध अउर पवित्तर करइ बरे समारोह क आयोजन किहेस। ओकर पाछे उ पचे महा पवित्तर ठउर स बाहर आएन, उ पचे एक संग खड़ा भएन, लेकिन एक बिसेस समूह मँ नाहीं। 12 अउर सबहिं लेवीबंसी गायक वेदी क पूरब कइँती खड़े रहेन। सबहिं आसाप, हेमान अउ यदूतून क गायक समूह हुवाँ रहेन अउर ओनकर पूत अउर ओनकर सम्बन्धी भी हुवाँ रहेन। उ सबई लेवीबंसी गायक सफेद कीमती मलमल क ओढ़ना पहिरे भए रहेन। उ पचे झाँझ, वीणा अउर सारंगी लिहे रहेन। ओन लेवी बंसी गाएकन क संग हुवाँ एक सौ बीस याजकन तुरही बजावत रहेन। 13 जउन तुरही बजावत रहेन अउर गावत रहेन, उ पचे एक ठु मनई क तरह रहेन। जब उ पचे यहोवा क स्तुति करत रहेन अउर ओका धन्यवाद देत रहेन तब उ पचे एक ही स्वर मँ गावत रहेन। तुरही, झाँझ अउ दूसर वाद्य यंत्रन पइ उ पचे जोर स आवाज करत रहेन, उ पचे यहोवा क स्तुति मँ इ गीत गाएन:

“यहोवा क स्तुति करा काहेकि उ भला अहइ।
    ओकर पिरेम अउर दया सास्वत अहइ।”

तब यहोवा क मन्दिर बादर स भरि उठा। 14 बादर क कारण याजक लगातार सेवा कइ न सकेन। एकर कारण रहा यहोवा क महिमा मन्दिर मँ भरि गइ रही।

Awadhi Bible: Easy-to-Read Version (ERV-AWA)

Awadhi Bible: Easy-to-Read Version Copyright © 2005 World Bible Translation Center

  Back

1 of 1

You'll get this book and many others when you join Bible Gateway Plus. Learn more

Viewing of
Cross references
Footnotes