هۆشەع 10

Kurdi Sorani Standard

10 ئیسرائیل دار مێوێکی پەل بڵاو بوو،
    بۆ خۆی بەری دەگرت.
بەپێی زۆری بەروبوومەکەی،
    قوربانگای زۆر کرد.
بەپێی باشی خاکەکەی،
    بەردە تەرخانکراوەکانی جوانتر کرد.
² دڵیان فریودەر بوو،
    ئێستا سزا دەدرێن.
یەزدان قوربانگاکانیان تێکدەشکێنێت،
    بەردە تەرخانکراوەکانیان تێکدەدات.

³ لەو کاتەدا دەڵێن: «ئێمە پاشامان نییە،
    چونکە لە یەزدان نەترساین،
ئەگەر پاشاشمان هەبێت،
    چیمان بۆ دەکات؟»
⁴ بە سوێندی درۆ قسە دەکەن،
    پەیمان دەبەستن،
ئینجا سکاڵا زیاد دەبێت
    وەک گیایەکی ژەهراوی نێو زەوییەکی کێڵدراو دەڕوێت.
⁵ خەڵکی سامیرە ترسیان هەیە
    لەسەر ئەو بتە گوێرەکەیەی کە لە شاری بێت‌ئاڤنە^[a]،
چونکە گەلەکەی شینی بۆ دەگێڕن و
    کاهینە بتپەرستەکانیشی لەبەر ئەو دەگریێن،
لەبەر شکۆمەندییەکەی،
    چونکە لێیان ستێنراوە.
⁶ ئەویش بۆ ئاشور دەبردرێت،
    وەک سەرانە بۆ پاشای شەڕانگێز.
ئەفرایم سەرشۆڕی وەردەگرێت و
    ئیسرائیلیش لەسەر بتە دارینەکانی شەرمەزار دەبێت.
⁷ سامیرە و پاشاکەی وەک چیلکە دارن
    بەسەر ڕووی ئاوەوە لەناودەچن.
⁸ نزرگەکانی سەر بەرزاییەکانی بەدکاری^[b] وێران دەبن،
    کە گوناهی ئیسرائیلن،
دڕکوداڵ لەسەر قوربانگاکانیان دەڕوێن.
    ئەو کاتە بە چیاکان دەڵێن، «دامانپۆشن!» و
    بە گردەکانیش دەڵێن، «بەسەرماندا بڕووخێن!»

⁹ «ئەی ئیسرائیل، لە سەردەمی گیڤعاوە گوناهت کرد،
    لەوێدا وەستان،
    لە گیڤعادا شەڕ نەوەی بەدکارانی نەگرتەوە؟
¹⁰ کەی بمەوێت تەمبێیان دەکەم،
    گەلان گەلەکۆمەیان لێ دەکەن،
    کاتێک بە دوو تاوانەکەیانەوە بەندن.
¹¹ ئەفرایم گوێرەکەیەکی^[c] ڕاهێنراوە
    حەز لە گێرەکردن دەکات.
لەبەر ئەوە من نیر دەخەمە سەر ملە جوانەکەی،
    سوار دەخەمە سەر ئەفرایم،
یەهودا دەیکێڵێت،
    یاقوبیش خەرتەی دەکات.
¹² ڕاستودروستی بۆ خۆتان بچێنن و
    بەروبوومی خۆشەویستی نەگۆڕ بدوورنەوە.
بۆ خۆتان بەیارێک بکێڵن،
    چونکە کاتی ئەوەیە ڕوو لە یەزدان بکەن،
    هەتا بێت و ڕاستودروستیتان بەسەردا ببارێنێت.
¹³ بەڵام ئێوە خراپەتان چاند و
    بەدڕەفتاریتان دوورییەوە،
    بەروبوومی درۆتان خوارد،
چونکە پشتت بە هێزی خۆت و
    بە زۆری پاڵەوانەکانت بەست،
¹⁴ چەخماخەی جەنگ لە دژی گەلەکەت بەرز دەبێتەوە.
    هەموو قەڵاکانت تێکدەدرێن،
وەک چۆن شەلمەن لە ڕۆژی جەنگدا بێت‌ئەربێلی^[d] تێکدا،
    دایک لەگەڵ منداڵەکانیدا بەزەویدا کێشران.
¹⁵ ئەی بێت‌ئێل، ئاواتان پێ دەکرێت،
    لەبەر ئەوەی خراپەکەتان گەورەیە.
لە بەرەبەیاندا،
    پاشای ئیسرائیل بە تەواوی لەناودەچێت.