ئەیوب 16

Kurdi Sorani Standard

⁶ «ئەگەر قسە بکەم لە خەمۆکیەکەم کەم نابێتەوە،
    ئەگەر بێدەنگیش بم لێم دوور ناکەوێتەوە.
⁷ ئەی خودایە تۆ ئێستا بێزارت کردووم،
    هەموو کەسوکارەکەی منت تێکداوە.
⁸ سستت کردم، سستییەکەم بووە شایەت،
    لاوازییەکەم لێم هەستاوە، بەرەوڕوو شایەتیم لەسەر دەدات.
⁹ تووڕەییەکەی پەلاماری دام و منی چەوساندەوە،
    ددانەکانی لێم جیڕکردەوە،
    دوژمنەکەم چاوی تێبڕیووم.
¹⁰ خەڵک دەمیان لێ داچەقاندووم،
    بە گاڵتەپێکردنەوە زللەیان لێدەدام،
    پێکەوە گەلەکۆمەیان لێکردم.
¹¹ خودا منی دایە دەست زۆردار و
    بۆ بەردەستی خراپەکار فڕێیدام.
¹² من ئاسوودە بووم و ئەو جێلەقی کردم،
    پشتەملی گرتم و وردوخاشی کردم.
منی کرد بە نیشانی خۆی؛
¹³     تیرهاوێژەکانی دەوریان دام.
جەرگی بڕیم و دڵی نەسووتا،
    زراوی منی بەسەر زەویدا ڕشت.
¹⁴ جار لەدوای جار شەقم دەکات،
    وەک جەنگاوەرێک هێرش دەکاتە سەرم.

¹⁵ «جلوبەرگی گوشم^[a] بە پێستمەوە دووری و
    خۆڵەمێشم بە سەری خۆمدا کرد.
¹⁶ دەموچاوم لەبەر گریان سوور هەڵگەڕا و
    ڕەشی بەسەر پێڵوی چاومدا هات.
¹⁷ لەگەڵ ئەوەی زۆرداری لە دەستی مندا نییە و
    نوێژەکەم بێگەردە.

¹⁸ «ئەی زەوی، خوێنەکەم دامەپۆشە،
    با جێیەک نەبێت بۆ هاوارم!
¹⁹ ئەوەتا لە ئێستاوە شایەتەکەم لە ئاسمانە،
    پارێزگارەکەم لە بەرزاییەکانە،
²⁰ ئەو هاوڕێمە و داکۆکیم لێ دەکات.
    کاتێک لەبەردەم خودا چاوەکانم فرمێسک دەڕێژن،^[b]
21 ئەو لە پێناوی پیاوێک لە خودا دەپاڕێتەوە،
    وەک پاڕانەوەی کەسێک بۆ هاوڕێکەی.

²² «تەمەنم کورتە و بەسەردەچێت،
    لە ڕێگایەکدا دیلم کە لێی ناگەڕێمەوە.