Nnwom 136

Nkwa Asem

Aseda dwom

136 Monna Awurade ase efisɛ oye; n’adɔe wɔ hɔ daa. ² Monna nea ɔso sen anyame nyinaa no ase; n’adɔe wɔ hɔ daa. ³ Monna awuranom mu tumfoɔ no ase; n’adɔe wɔ hɔ daa. ⁴ ɔno nko ara na ɔyɛ anwonwade; n’adɔe wɔ hɔ daa. ⁵ Ne nyansa mu na ɔbɔɔ ɔsoro; n’adɔe wɔ hɔ daa. ⁶ Ɔbɔɔ asase wɔ nsu a emu ware so; n’adɔe wɔ hɔ daa. ⁷ Ɔbɔɔ owia ne ɔsram, n’adɔe wɔ hɔ daa. ⁸ Owia sɛ ɔnhyɛ adekyee so; n’adɔe wɔ hɔ daa; ⁹ na ɔsram ne nsoromma nhyɛ anadwo so; n’adɔe wɔ hɔ daa. ¹⁰ Okum Misraimfo mmakan; n’adɔe wɔ hɔ daa. ¹¹ Odii Israelfo anim fii Misraim; n’adɔe wɔ hɔ daa. ¹² Ɔnam ne nsa a ɛyɛ den ne ne basa a tumi wɔ mu no so; n’adɔe wɔ hɔ daa. ¹³ Ɔpaee ɛpo Kɔkɔɔ no mu; n’adɔe wɔ hɔ daa. ¹⁴ Odii ne nkurɔfo anim ma wɔfaa mu; n’adɔe wɔ hɔ daa. ¹⁵ Nanso ɔmaa nsu no faa Misraimhene ne n’asraafo; n’adɔe wɔ hɔ daa.

¹⁶ Odii ne nkurɔfo anim wɔ sare no so; n’adɔe wɔ hɔ daa. ¹⁷ Okum ahene atumfoɔ; n’adɔe wɔ hɔ daa. ¹⁸ Okum ahene a wɔagye din; n’adɔe wɔ hɔ daa. ¹⁹ Amorihene, Sihon; n’adɔe wɔ hɔ daa; ²⁰ ne Basanhene, Og; n’adɔe wɔ hɔ daa. ²¹ Ɔde wɔn nsase maa ne nkurɔfo; n’adɔe wɔ hɔ daa. ²² Ɔde maa Israel ne somfo; n’adɔe wɔ hɔ daa.

²³ Wodii yɛn so nkonim no, ne werɛ amfi yɛn; n’adɔe wɔ hɔ daa. ²⁴ Ogyee yɛn fii yɛn atamfo nsam; n’adɔe wɔ hɔ daa.

²⁵ Ɔma ɔteasefo biara aduan; n’adɔe wɔ hɔ daa. ²⁶ Monna ɔsorosoro Nyankopɔn no ase; n’adɔe wɔ hɔ daa.