Matay 24

Ne Bibliaj Tik Nawat

—Ankitat muchi ini? Kia nimetzinhilwia: nikan inte mukawas nian se tet ijpak seuk ne inte yawit kitamutat talchi.

—Shitechilwi keman yawi panu muchi uni wan ken yawi muishmati ka tiajsi wan yawia tami muchi?

—Shiktalikan cuidadoj ma inte metzinshijshikukan, ⁵ ika miak walasket tik nutukay inat: "Naja ne Mawaltijtuk", wan miak yawit mushijshikuat. ⁶ Anyawit takakit ka musumat nujme ne talmet; maka shimajmawikan, ika melka nemi pal muchiwa, inteuk tamis muchi. ⁷ Ika yawit musumat itzalan ne tejtechan wan itzalan ne talmet, yawit mayanat wan nujme yawi ulini. ⁸ Yaja kwak pewas wey takukulis kenha ken kwak yawia puni se. ⁹ Kwakuni yawit metzintemakat, yawi sujsul uij wan yawit metzinmiktiat wan muchi ne tejtechan yawit metzinhishijiat ipanpa nutukay, ¹⁰ wan kwakuni miak yawit mutekukujmatit, wan sejse kintemakasket sejse, ¹¹ wan yawit kisat miak tashijshikuani wan kinshijshikusket miak, ¹² wan ipanpa muchi tay yawi muchiwa tay inte nemiskia pal muchiwa, miak yawit seseyat inyulu. ¹³ Ká ne kiselia muchi hasta ma tami, yaja yawi mupalewia, ¹⁴ wan tanajnawatilisket ini yeknawatilis ipal ne tatekimakalis nujme ne taltikpak pal kimatit muchi ne tejtechan. Wan kwakuni yawi tami.

¹⁵ Yajika kwak ankitat ken nujme muwilewa sujsul, ken inak ne taketzani Daniel ejkatuk tik ne ipal ne Teut (ká amatachia ma kimati tay uni kineki ina), ¹⁶ kwakuni, ne nemit tik Yudaya ma chulukan ka tepet; ¹⁷ ne nemi pak itzunpan ne ikal ma inte kutemu kalijtik pal kalkwi tatka; ¹⁸ wan ne nemi tik ne kojtan ma inte mukwepa ka ichan pal kalkwi ikwajkwach! ¹⁹ Tik uni tujtunal, pobrejchichin ne wejweyijti wan ne tachichit! ²⁰ Shiktajtanikan ne Teut ma inte nemi pal anchuluat tik ne shupan nian tik ne sewilis.

²¹ Ika yawi sea uij: kwak tamik ne Teut kichiwa muchi hasta ashan inte keman muitztuk tatka kenha. ²² Asu inte mukutunaskiat uni tujtunal, inte mupalewiskia iweyka nian se; wan semaya mukutunasket inpanpa ne muishpejpentiwit.

²³ Kwakuni asu aka metzinhilwia: "Shikita, uni nemi ne Mawaltijtuk!" o "Nikan nemi!" maka shikmatikan ka ijkia, ²⁴ ika muketzasket sejse inat ka yejemet ne Mawaltijtuk wan tashijshikuat, wan kichiwasket muchi tay welit pal mumati ka ijkia pal kiane nusan ne muishpejpentiwit mushijshikuat. ²⁵ Naja nimetzinhilwijtuka! ²⁶ Yajika tel, asu metzinhilwiat: "Uni nemi tik ne kojtan!", maka shumet ka né. Asu inat: "Nikansan kalijtik!", shikmatikan ka inte tejkia. ²⁷ Kenha ken takipini witz ka né wan muita nujme ne ilwikak, ijkiunisan muchiwas kwak ajsi witz ne Itelpuch ne Takat. ²⁸ Kan nemi ne mikini, unisan musentepewa ne kwawti.

²⁹ Kwak tamit uni tujtunal sujsul uij, yawi kunyuakisa ne tunal, wan tea yawi tajtawia ne metzti, wan yawit kuwetzit ne sitalmet, wan ka ikajku yawit mutzejtzeluat ne itajtajpal, ³⁰ wan kwakuni muitas tik ne ilwikak se pal muishmati ne Itelpuch ne Takat, wan kwakuni muchi ne takamet ipal ne taltikpak yawit mutechtiat wan tachiasket witz ne Itelpuch ne Takat ijpak mijmishti ka ikajku wan weli wey wan tzitzinaka. ³¹ Wan yaja yawi kintuktia ne itajtanawatiani, wan mutzutzunas se wey trompetaj, wan ne kinhishpejpentiwit walasket nujme ne taltikpak wan musentepewasket itech yaja.

³² Shimumachtikan tay techmachtia ne casoj pal ini kwawit: kwak ne imajtzal nemiuk selek wan pewat takatit ijiswayu, ankimatit ka witzaya ne shupan. ³³ Kenhaya, kwak ankitat ka muchi tay ninatuk muchiwa, shikmatikan ka uni witzaya, nemia tik ne tenkal. ³⁴ Kia nimetzinhilwia: inte yasnekit itan tal ne takamet pal ashan hasta ma muchiwa muchi uni. ³⁵ Ne ilwikak wan ne tal panusket, wan ini tay nina inte yawi panu!

³⁶ Inte kimati aka keman yawi ajsi uni tunal wan horaj: nian ne tanawatianimet ka ikajku, nian ne Itelpuch, semaya ne Teteku kimati, ³⁷ ika kenha ken tik ne tujtunal pal Noa, ijkiuni muchiwas kwak ajsi ne Itelpuch ne Teut. ³⁸ Kenha ken nemiket tik uni tujtunal kwak inteuk ajsik ne tepeat — takwat wan atit, munamiktiat wan tanamiktiat hasta kalakik Noa tik ne takukal, ³⁹ wan te mumatket hasta walaj ne tepeat ne kinwikak muchi — ijkiunisan tel walas ne Itelpuch ne Takat. ⁴⁰ Kwakuni, ume yawit nemit tik ne mil, wan ne se kiwikat wan ne seuk kiajkawat; ⁴¹ ume yawit tisit tik ne metat, wan ne se muwika wan ne se muajkawa.

⁴² Yajika shikishpelwikan ika inte ankimatit katiawel ne tunal kwak witz ne Anmuteku. ⁴³ Shikmatikan ini: ka asu kimatiskia ne itekuyu ne kal ne horaj keman techtekit witzet, mutaliskia kipachiwia wan te muajkawaskia mukaltapana. ⁴⁴ Neka anmejemet nusan shimuekchiwakan, ika ijtik ne horaj kwak inte anmumatit yawi witz ne Itelpuch ne Takat.

Ká tel yek tekitini? Yaja ká kimati tay ne muneki muchiwa. Ne tajtzin kitalia yajane ijpak muchi ne kaltekitinimet ma kinmaka intakwal kwak muneki. ⁴⁶ Suertej kipia uni tekitini asu ne itekuyu kiajsi kichiwa ijkiuni kwak walmukwepa. ⁴⁷ Kia nimetzinhilwia ka asu ijkiuni, yawi kitalia tatuktia tik muchi tay ipal. ⁴⁸ Wan asu uni tekitini inte yek wan asu ina tik iyulu: "Nutekuyu ishtuna witz" ⁴⁹ wan pewa kinchajchalua ne ikunpawan wan takwa wan ati wan mutawantia, ⁵⁰ ne itekuyu yawi witz kwak inte tejchia ika inte kimati tay horaj witz, ⁵¹ wan kikujkutunas wan kituktis iwan ne tensasalmet. Ikuni yawi chuka wan tzalani itajtan!