Ebrayujmet 8
Ne Bibliaj Tik Nawat
8 Ini ne tay sujsul wey ipal muchi tay tinatiwit: tikpiata se weypalej ijkiuni, muetztuk ka imayekkan ne ikuijpal ne Wey tik ne ilwikak; 2 se tekitini ipal ne teupantzin wan ne yekkaya tawipanti ne kikunaktij ne Tajtzin, intesu se takat.
3 Muchi ne weypalejmet mutalijtiwit pal kalwikat tejtetakulis ipal Teut; neka muneki ma yajini nusan kipia se pal kitakulia. 4 Asu yaja nemiskia ijpak ne taltikpak, inte muchiwaskia se palej, ika nemit palejmet ne tetakuliat ken ina ne tajtuli, 5 ne tekitit ken se tamachtilis wan iekawyu ipal ne tay ipal ne ilwikak ka ikajku, ijkiunisan ken mutukaytij Moshe kwak yaja yawia kitamia ne tawipanti.
Shikita —inak— ma shikchiwa muchi ken ne ejemploj ne muneshtij muishpan ijpak ne tepet.
6 Ashkan kiajsituk se tekitilis te kenha wan yaja tajkutaketzani ipal se sentaketzat mas yek ne mutajtulchijki iwan projpromesaj mas yejyek.
7 Asu uni achtu nentuskia yek, te aka kipiaskia taika kitemuskia ukseuk. 8 Ne Teut inak ka kichijtuyat tay inte nemituyat pal kichiwat, wan:
Witzet tujtunal —ina Tutajwan— keman nikchiwas iwan ne ikal Israel wan iwan ne ikal Yuda se yankwik sentaketzat, 9 ne inte ken ne sentaketzat nikchijki iwan ne innoywan tik ne tunal kwak nikitzkij ne inmey wan nikinhishtij tik Egipto, ika yejemet inte tajpishket ne nusentaketzat, wan naja inte nikinchiwilij casoj —ina Tutajwan—; 10 ika, ini ne sentaketzat niaw niktalilia ne ikal Israel kwak panut uni tujtunal —ina Tutajwan—. Niaw niktalia nutajtuli tik ne intamatilis wan niaw nikinhijkwilua ijpak inyujyulu, wan nimuchiwas Teut inpal, wan yejemet muchiwasket nutechan; 11 wan te inas pal kimachtia sejse ne itechanchanej wan sejse ne iiknew: "Shikishmati ne Tutajwan", ika muchi, chijchikitik wan wejwey, nechmatisket, 12 ika nikintasujtas wan niktapupulwis tay kichijtiwit tay inteyek wan tea nikelnamikis.
13 Kwak yaja ina "se yankwik", kineki ina ka palanik ne achtu. Tay ne palani wan chulejtia, yawia puliwi.
Ne Bibliaj Tik Nawat · © 2008, 2012 Jan Morrow