Juan 9

Mushuj Testamento Diospaj Shimi

Mana ricuj huacharishca runatami Jesús alliyachishca

9 Chaimanta llujshishpa ricushpaca Jesusca, mana ricuj huacharishca shuj runatami ricurca. ² Chaita ricushpami, yachacujcunaca:

–Rabí, cai runa chashna huacharichunca, ¿paillatajchu, mana cashpaca, paipaj yaya mamachu juchallishca canga imashi?– nishpami tapurcacuna.

³ Jesusca, cashnami cutichirca:

–Pai, mana cashpaca paipaj yaya mama juchallishcamantaca, mana chashna huacharircachu. Ashtahuanpish Diosllataj tucuita rurai tucuj cashcata cai runapi ricuchichunmi, chashnaca huacharirca. ⁴ Punlla tiyajpirajmi, Ñucata Cachaj ‘Rurai’ nishcataca rurana cani. Tutayajpica pi mana imata rurai tucunchu. ⁵ Cai pachapi cashcacamaca, cai pachapi achijyachij Luzmi cani– nircami.

⁶ Chashna nishpaca Jesusca, allpata ch'ucahuan nuyuchishpa chapushpami, mana ricujpaj ñahuipi llutarca. ⁷ Chai q'uipaca:

–Ri, Siloé yacu tandarishcapi maillarigri– nircami.

Chai yacupi maillarigrishpaca, ricuj ñahuiyuj tigramurcallami (Siloé shimica: “Cachashca” nisha ninmi). ⁸ Chaimantami c'uchullapi causajcunapish, mana ricuj cashcata rijsijcunapish: «Caica, ¿mañashpa tiyaj runa shiná?» ninacurca.

⁹ Maijancunaca: «Paitajmari» nircacunami.

Cutin shujtajcunaca: «Paimi yuyachin» nircacunami.

Chaimantami paica: «Ñucatajmari cani» nirca.

¹⁰ Shina nijpica:

–¿Ima shinataj cambaj ñahuicunaca pascarirca?– nishpa tapujpimi,

¹¹ cashna cutichirca:

–Jesús shuti runamari allpata chapushpa, ñuca ñahuicunapi llutarca. Chaimantaca: “Ri, Siloé yacupi maillarigri” nircami. Pai nishca shina chai yacupi maillarigrishpaca, ricurcanillamari– nircami.

¹² Shina nijpica:

–¿Maipitaj chai runaca?– nishpa tapujpi, paica:

–Imatajshiari, mana yachanichu– nircami.

Fariseocunami ñahuita pi alliyachishcata tapushca

¹³ Mana ricuj cashca runataca, fariseocunapajmanmi pusharcacuna. ¹⁴ Ch'ucahuan allpata chapushpa ñahuicunapi llutashpa, Jesús alliyachi punllaca sabadomi carca. ¹⁵ Chai alliyaj runataca fariseocunapishmi, paipaj ñahuicuna ima shina pascarishcata tapurcacuna. Chaipimi paica:

–Allpa chapushcata ñuca ñahuicunapi llutajpi maillarigrishpaca, ricurcanillami– nirca.

¹⁶ Chashna nijpimi, maijan fariseocunaca: «Sabadota mana huaquichij chai runaca, mana Diosmanta shamunchu» nircacunami. Cutin shujtajcunaca: «¿Ima shinataj juchayuj runa cashpaca, chashna señalcunataca rurai tucungari?» nircacunami.

Chashnami paicunapurallataj shujta, shujta nishpa rimanacurcacuna.

¹⁷ Chaimantami, mana ricuj cashca runataca:

–Canca, ñahuicunata pascajtaca, ¿ima ninguitaj?– nishpa, cutin tapujpica:

–Paica, Dios ima nishcata huillajmari– nirca.

¹⁸ Shina nijpipish judiocunaca, mana ricuj runata alliyachishcataca, chai runapaj yaya mamata cayashpa tapungacama manataj crircacunachu. ¹⁹ Yaya mamataca:

–¿Caichu mana ricuj huacharishca, cancunapaj churi? ¿Ima shinataj cunanca ricucun?– nishpami tapurcacuna.

²⁰ Chashna nijpi paipaj yaya mamaca, cashnami cutichirca:

–Mana ricuj huacharishca ñucanchij churi cashcataca yachanchijmi. ²¹ Ashtahuanpish cunanca ima shina pai ricucushcata, pi paipaj ñahuicunata pascashcataca mana yachanchijchu. Paica juilluyujmi, paillatataj tapuichijlla, huillangallami– nircacunami.

²² Judiocunata manchashcamantami, yaya mamaca chashna nirca. Judiocunaca pipish Jesusta ‘Mesiasmi’ nishpa purijtaca, tandanacuna huasimanta llujshichishpa cachanatami yuyarinacushca carca. ²³ Chaimantami yaya mamaca: «Juilluyujmi, paillatataj tapuichijlla» nircacuna. ²⁴ Shina nijpimi mana ricuj cashca runata cutin cayashpaca:

–¡Taita Diosta jatunyachi! Ñucanchijca chai runataca, juchayuj cashcatami yachanchij– nircacuna.

²⁵ Chashna nijpica:

–¿Paica juchayujchu manachu juchayuj imachari? Chaitaca mana yachanichu. Ñucaca mana ricuj cashca cashpapish, cunanca Paimanta ricucushcallatami yachani– nircami.

²⁶ Shina nijpipish cutinmi:

–¿Imatataj cantaca rurarca? ¿Ima shinataj cambaj ñahuicunataca pascarca?– nishpa tapurcacuna.

²⁷ Shina nijpica:

–Ñamari huillarcani, mana uyashun nircanguichijca. ¿Ima nishpataj cutintaj tapunguichij? ¿Cancunapishchu Paipaj yachacujcuna tucushun ninguichij?– nircami.

²⁸ Chashna nijpica p'iñarishpami, maipish cachun rimashpa cashna nirca:

–¡Canchari Paipaj yachacuj cangui! ¡Ñucanchijca Moisespaj yachacujcunamari canchij! ²⁹ Moiseshuan Taita Dios rimashcataca, allimari yachanchij. Ashtahuanpish chai runataca, maimanta shamushcata mana yachanchijchu– nircacunami.

³⁰ Shina nijpi chai runaca, cashnami nirca:

–Cunantajca mancharinimi. Paica, maimanta shamushcata cancuna mana yachajpipish, ñuca ñahuicunataca pascarcamari. ³¹ Taita Diosca juchayujcunata mana uyaj cashcataca yachanchijmi. Ashtahuanpish Paita manchaj, Paipaj munaita rurajllatami uyan. ³² Mana ricuj huacharishcata pi alliyachin nijtaca, cunancama manataj uyashcanchijchu. ³³ Paica mana Taita Diospajmanta shamushca cashpaca, imata mana rurai tucunmanchu– nircami.

³⁴ Chashna nijpica:

–Canca huacharipachamantami juchasapa cashcangui. ¿Chai jahuachu, ñucanchijtaca yachachisha ninguiari?– nishpami, llujshichishpa cacharcacuna.

Fariseocunaca yuyai huichcashcami cashca

³⁵ Jesusca, Pai alliyachishca runata llujshichishpa cachashcata uyashpami, mashcashpa paihuan tupashpaca:

–Canca, ¿Diospaj Churitaca cringuichu?– nirca.

³⁶ Chashna nijpica:

–Amitolla, ¿pitaj Paica, ñuca Paita cringapaj, huillahuai?– nircami.

³⁷ Shina nijpi Jesusca:

–Paitaca ricucunguillatajca, cunan canhuan rimacujllatajmari cani– nircami.

³⁸ Chashna nijpica:

–Crinimari, Amito– nishpami, Paitaca adorarca.

³⁹ Chaipimi Jesusca:

–Ñucaca, cai pachapi causajcuna ima shina cashcata ricuchingapajmi shamurcani. Mana ricujcunaca ricuchun, ricujcunaca ama ricuchunmi shamurcani– nircami.

⁴⁰ Shina nijta paihuan caj maijan fariseocuna uyashpaca:

–¿Ñucanchijpish mana ricujcunachari canchigari?– nircacunami.

⁴¹ Chashna nijpi Jesusca, cashnami nirca:

–Cancuna mana ricujcuna cashpaca, jucha illajmari canguichijman. Ashtahuanpish cunanca: “Ricujcunamari canchij” nishpapish, juchapimari causanguichij.