Матеј 2

Macedonian New Testament

Посетата од Исток

2 Исус се роди во градот Витлеем, во покраината Јудеја, во времето кога таму владееше царот Ирод. Тогаш во Ерусалим допатуваа неколку мудреци^[a] од некоја источна земја ² и почнаа да се распрашуваат: „Каде е новородениот јудејски Цар? Видовме кога на исток се појави Неговата ѕвезда и дојдовме да Му се поклониме.“

³ Кога го слушна ова, царот Ирод се вознемири, а со него и целиот Ерусалим. ⁴ Тој ги повика сите поглавари меѓу свештениците и сите вероучители^[b] меѓу народот, за да ги праша, каде треба да се роди Месијата. ⁵ Тие му одговорија: „Во градот Витлеем, кој се наоѓа во покраината Јудеја; зашто, еве како запишал пророкот Михеј:

⁶ ,Ти Витлееме, во јудејската земја,

по ништо не заостануваш зад водечките градови во Јудеја,

зашто од тебе ќе произлезе Водач

Кој ќе му биде Пастир на мојот народ Израел^[c].‘“

⁷ Тогаш Ирод скришно ги повика мудреците и од нив го дозна точното време кога се појавила ѕвездата. ⁸ Потоа ги испрати за Витлеем, порачувајќи им вака: „Одете и подробно распрашајте се за Детето; штом ќе го најдете, јавете ми да појдам и јас да Му се поклонам.“ ⁹ Откако го ислушаа царот, тие тргнаа на пат. И ете, ѕвездата што ја беа виделе на Исток одново се појави и ги водеше се до местото каде што се наоѓаше Детето. ¹⁰ Кога видоа дека ѕвездата запре, тие бликнаа од радост! ¹¹ Влегувајќи во куќата, Го видоа Детето и мајка Му Марија, па паднаа ничкум и Му се поклонија. Потоа, ги отворија своите ковчежиња и Го даруваа со злато, со ливан и со смирна^[d].

¹² Потоа тие си заминаа за својата земја по друг пат, откако Бог насон ги предупреди да не се враќаат кај Ирод.

¹³ По заминувањето на мудреците, на Јосиф му се јави насон ангел Господов и му рече: „Стани, земи ги Детето и мајка Му и бегај во Египет; остани таму додека не ти се јавам, зашто Ирод ќе го бара Детето за да Го убие.“ ¹⁴ Тогаш Јосиф стана, ги зеде Детето и мајка Му Марија и ноќта заминаа за Египет. ¹⁵ И останаа таму се до смртта на Ирод. Со ова се исполнуваше претскажаното од Бог преку пророкот Осија^[e]:

„Од Египет го повикав Мојот Син.“

Колежот на новородените деца

¹⁶ Ирод збесна кога сфати дека мудреците го надитрија и нареди во Витлеем и во неговата околина да бидат убиени сите машки деца до двегодишна возраст - согласно со времето што го беше дознал од мудреците. ¹⁷ Со ова се исполнуваше претскажаното од пророкот Еремија:

¹⁸ „Пискотници се слушаат во Рама,

плач и тажни лелеци;

Рахела плаче по своите деца

и не сака да се утеши,

зашто нив повеќе ги нема^[f].“

Враќањето од Египет во Назарет

¹⁹ По смртта на Ирод, на Јосиф, кој беше во Египет, му се јави насон ангел Господов ²⁰ и му рече: „Стани, земи ги Детето и мајка Му и врати се во израелската земја, зашто изумреа тие што сакаа да Му го одземат животот на Детето.“ ²¹ Тогаш Јосиф стана, ги зеде Детето и мајка Му и сите се вратија во израелската земја. ²² Меѓутоа, кога Јосиф дозна дека во Јудеја, на местото на Ирод дошол на власт неговиот син Архелај, се исплаши да појде таму. Па откако насон прими упатства, замина во покраината Галилеја. ²³ Таму се насели во градот Назарет, со што се исполнуваше претскажаното од пророците дека Месијата ќе Го викаат „Назареќанец“.